فيديو| «البوركيني» يثير أزمة فى منتجعات الساحل الشمالي.. تعرف على التفاصيل

أثيرت حالة من الجدل خلال الساعات الماضية، حول ما يسمى بالمايوه الشرعي "البوركيني" للسيدات، بعد منع بعض النزلاء لسيدة محجبة من النزول لحمام سباحة إحدى القرى بهذا الزي، بدعوى أنه مخالف للقواعد واللوائح المنظمة للمنتجع.

 

والبوركيني هو "لباس بحر نسائي ساتر.. يتيح للمرأة السباحة مع تغطية كافة جسمها باستثناء الوجه والكفين والقدمين، ويتألف من ثلاث قطع هي قميص وسروال وغطاء للرأس، وهو لباس شائع بين المسلمات المحجبات أثناء ارتيادهن الشواطئ".

 

البداية بمقطع فيديو انتشر على موقع التواصل الاجتماعي، "فيس بوك"، تظهر فيه إحدى السيدات وهى تطلب من سيدة أخرى الخروج من حمام السباحة لارتدائها "البوركيني"، وسط سخط من البعض الذين اتهموا السيدة الأولى بالعنصرية.

 

الفيديو نشره زوج السيدة التى كانت ترتدي " البوركيني"، مصحوبا بتدوينه قال فيها : "طبعا كل الناس اللي عرفانى عارفة انى مش بتكلم او بعلق كتير على حاجة بس حصلت معايا النهاردة.. مشكلة انا شايف انها ماينفعش نسكت عليها عشان دى هتكون مثال لنا و لأخواتنا و زوجاتنا ولأجيال ورانا كتير ولازم الناس دى تتغير ويكون لها عقاب زي ما ابتدينا نتغير و نغير عقول ناس كتير و مرضى كتير فى مجتمعنا".

 

 وأضاف: " ده فى مثال واقعى حصل لمراتى النهاردة وانا معاها فى pool فى ستيلا الساحل لقيت سكان جايين يقولولها واحنا فى الماية ماينفعش تنزلى باللبس ده او بالمايوه ده !! قالت ليه بكل استغراب و خوف كما لو كانت عملت حاجة غلط . واحدة عندها شاليه زيها زي اى حد و ييجى ناس يقولوا لها اخرجى عشان انتى لابسة مايوه شرعى و مضايقة عيوننا بيه!!هنا كله لابس بيكينى او one piece".

 

وأضاف :" وطبعا عشان ناس متتطلعش تقول Stella ونربط مسيحيين معانا أحب اقولك ان فيه بنات و شباب زي الورد مسيحين أكتر من مسلمين و كلهم واحد كانوا بيدافعوا عن مراتى و بيقولوا للناس دي انتو مرضى".

 

وتابع :"أنا شايف اللي حصل ده عنصرية زيهم زى اللي بيقولوا للي لابسة لبس قصير ماتلبسيش وأكيد دول اللي برده عندهم عنصرية اللون و الدين ياريت كل واحد يبقى فى حاله احنا فى ٢٠٢٠ يا ناس كفاية جهل، وفى فيديو كمان عشان الناس تعمل share ويشوفوا بعينهم وانا اسف عشان فيديو ١٠ دقائق ياريت اسمع آراءكم".

 

وبعد واقعة قرية ستيلا الساحل، تكررت واقعة مشابهة فى قرية لافيتسا، حيث نشرت سيدة تدعى "ميرنا الواصف"، تدوينه سردت فيها ما حدث معها في أحد حمامات السباحة بلافيستا، قائلة: "لما رحت عشان أنزل واحد من ملاك لافيستا كاسكادا الساحل الشمالي مكانش عاجبه المايوه الشرعي بتاعي، وطلبه من أمن البيسين إنه يطلعني. لما قررنا نروح نشتكي للإدارة قالوا لنا إن ديه القواعد والقوانين بتاعت الشركة، والملاك وقعوا اتفاق في العقد بتاعهم يقول إن ممنوع المحجبات يتواجدوا في البيسين".

 

وتابعت: "وكمان اتقال لنا إن دي مش أول مرة يحصل كده وإن في ملاك صوروا المحجبات اللي في البيسين وبعتوها بشكاوى لإدارة لا فيستا.. أنا سمعت عن حوادث كتير شبه ديه في الشواطئ والمنتجعات في البلد لكن عمري ما قدرت أفهم أو أحس إزاي ديه حاجة مهينة لحد لما اتحطيت في الموقف بنفسي. أنا اتضايقت جدًا واتعصبت وأحرجت جدًا لما الحارس جه وشاور لي أطلع”. مضيفة: “مش قادرة أتخيل إن مليش الحق إني أنزل البيسين عشان مش لابسة بيكيني مثلاً!؟.. حقيقي إنت مين عشان تيجي تختار لي ألبس إيه وما ألبسش إيه!!".

 

فى مقابل هذه التدوينات، نشرت سيدة تدعى نادية ناصر الأتربي، مجموعة تدوينات عبرت فيها اشمئزازها من منظر "المايوه الشرعي"، قائلة: "أنا واحده بتقرف من منظر البوركيني ايه الي يجيبكم الساحل، روحو باللبس المحتشم ده اماكن الدين، انا مش حاباه انا حرة.. ياريت نلتزم بقواعد المكان قبل دخوله او نتركة، الملاك معروف ان فى انترفيو قبل التعاقد للعائلة علشان يتاكدو ان مفيش محجبات علشان ميحصلش الصدام والاحراج دة؛ لان احنا اشترينا الشاليهات في قرى فيها قوانين.. يا تلتزم بيها يا متدخلهاش".

 

وفى تدوينه أخرى قالت الأتربي: "طيب علشان نقفل الموضوع دة وافهمكم حاجه، فى اماكن مانعه البوركينى وممنوع تملك المحجبات او شخص مراتة محجبة حفاظا علي المنظر العام لان فى ناس بتشوف ده مقرف وانا منهم مع احترامى لشخص الناس انا بتكلم عن الاستايل".

 

 

وتابعت :" قبل ماسعادتك بتتملك الوحدة بيتعمل معاك انترفيو وبيشوفوك شغال فين وثقافتك اية ولو مراتك محجبه او بنتك او اى حد مبيبيعوش ليك الوحدة وده معروف علشان ميحصلش الصدامات دة، ولما الناس بتيجى تحجز علشان تنزل بيطلب منها رابط حساب انستجرام وفيسبوك علشان يتأكدو من شكلهم وثقافتهم ولبسهم انة ميكنش عكس الناس الى جوة وشكلة يضايقهم".

 

وأضافت :" ليكم اماكن كتير جدا روحو انزلو فيها بالجلاليب لو تحبو وسيبولنا الساحل بس احنا حابين كده ومشتريين المكان وعارفين ان مش هنشوف محجبين وده زى قانون فى الداخل مش معلن بشكل رسمى لكن موجود علشان يخلقو كوميونيتى معين".

 

وأردفت :"ده الشروط الي اتعاقدنا ودفعنا ملايين بناء عليها، الي عايز يغيرها يروح مجلس الشعب يطلع قانون وساعتها هنقاضي الشركه الي المفروض حاطه الشروط ده وخالفتها وناخد تعويض ونشوف مكان تاني مش ذنبي اني بنبه الامن لمخالفة الشروط ولا ذنب الامن انه بيطبق الشروط".