الطفل الرياضي طعامه مختلف.. تعرفي على غذائه المناسب
ممارسة الأطفال للرياضة أمر ضروري لرفع مستوى لياقتهم البدنية، ولكن تعاني الأم في كثير من الأحيان من رفض الطفل لتناول الطعام الجيد، أو معرفة النظام المثالي المسموح به والمناسب مع اللعبة الرياضية، أو تجد صعوبة في معرفة المسموح والمرغوب به، أو الممنوع والمرفوض تناوله.
وأكد الدكتور أحمد أمين استشاري طب الأطفال أن "الطفل اللي بيمارس رياضة لازم يكون نظام أكله مختلف عن العادي؛ عشان يقدر يستفيد الاستفادة الأمثل من الرياضة اللي بيمارسها، ومتسببلوش إجهاد أو تؤثر على نموه الطبيعي".
وذكر أمين عدة نصائح ضرورة يجب على الأم اتباعها وتوجيه طفلها وفقا لذلك، قائلا: "في يوم التمرين الوجبة اللي قبل التمرين لازم تكون قبله بـ ٣ ساعات على الأقل، عشان ندي فرصة للمعدة عشان تفضي الأكل اللي فيها"، لافتا إلى أن "الوجبة دي لازم تتكون من الآتي: كمية كربوهيدرات كتيرة عشان تمده بالطاقة وبروتين، مينفعش ألياف ودهون عشان بتاخد وقت طويل في الهضم والامتصاص، وممكن تسبب إجهاد للطفل وتؤثر على مجهوده".
وأضافت في تدوينة له عبر صفحته على موقع التواصل الاجتماعي فيسبوك: "لو الظروف متسمحش الوجبة تبقى قبل التمرين بـ ٣ ساعات، لو ضروري ياكل يبقى هياكل حاجة سريعة الامتصاص زي السكريات البسيطة مثل الفواكة، والعصاير، وممكن العيش".
وتابع استشاري طب الأطفال: "بعد التمرين بنص ساعة لازم الطفل ياخد snack من السكريات؛ فاكهة أو عصير عشان يعوض مخزون الطاقة المستهلكة"، مشيرًا إلى أنه "بعد التمرين بساعة لازم ياخد الوجبة الرئيسية اللي لازم تكون غنية جدا بالبروتين، وفيها كمية معقولة من الدهون، عشان يقدر يبني عضلاته ويستفيد من تمرينه".
ونصح أمين الأم، قائلا: "في أثناء التمرين لازم تتأكدي أن ابنك أو بنتك بياخد كميات كفاية من السوائل، لازم توجهيه أنه يشرب كل ١٥ لـ ٢٠ دقيقة أثناء التمرين"، لافتا إلى أن "موضوع أن الطفل مينفعش يشرب وهو بيتمرن عشان ده بيتعب القلب والرئة ده كله كلام فارغ و حواديت جدات".
أما بالنسبة للسوائل التي يجب أن يشربها الأبناء، فقد أوضح أمين "شوفي.. متغلبيش نفسك.. المية كفاية.. متروحيش تشتري سوائل الرياضيين والكلام اللي بالشيء الفلاني ده.. مدام طفلك مش بيتمرن تمرين عنيف أكتر من ساعتين في رياضة عنيفة، يبقى مية كفاية ومن الحنفية كمان".
وفيما يتعلق بالأطفال الذين لا يحبون الماء، فقد أشار استشاري طب الأطفال إلى: "طيب لو طفلي مش بيحب يشرب مية أو بيتمرن تمرين عنيف؛ العصاير المخففة في الحالة دي بديل ممتاز جدا وكافي.. برضو متشتريش سوائل رياضيين".
وأشار أمين إلى "فيتامين دال vitamin D ضروري جدًا لأي حد بيلعب رياضة.. بيحافظ على عظم الطفل وبيقويه، وبيقلل كتير جدا من احتمالية إصابات الملاعب.. ادي ابنك ٦٠٠ وحدة يوميا خصوصا لو تمرينه في صالة مغلقة".
وشدد الطبيب على ضرورة تناول الأطعمة الغنية بالحديد، قائلا: "وأخيرا متنسيش الأكل الغني بالحديد.. احمي طفلك من أنيميا نقص الحديد.. الأنيميا بتخلي طفلك غير قادر على بذل مجهود ويتعب بسرعة".
اقرأ أيضا:
