"حبني زي ما أنا" .. مطب المشاكل الزوجية
"لازم يحبني زي ما أنا"، "لازم يحبني بعيوبي"، "لازم يحبني بعبلي" عبارات تتردد في أوساط الحياة الزوجية، فيرى أحد طرفي العلاقة الزوجية أن شريك حياته ملزم بتقديم الدعم والحب له مهما كانت العيوب، وأنه غير مطالب بالتغلب على عيوبه مهما حدث، وهو الأمر الذي يؤثر سلبا على الحياة، ويؤدي إلى المشاكل الزوجية.
ففي بداية الزواج والارتباط ينبهر كل شريك بصفات الطرف الآخر، متناسيا العيوب ومتغاضيا عن السلبيات التي قد يراها صغيرة جدا، ولكن مع مرور الوقت يظهر الحجم الطبيعي للعيوب، وهو ما يستدعي البحث عن حل للمشاكل حتى لا تتفاقم الخلافات، أو تتحول مشاعر الحب إلى كراهية.
مصر العربية استطلعت آراء عدد من الشباب، فيقول زكريا السيد: "أغلب الناس استسلمت ومش حابة تغير من نفسها.. ياريت كان استقرار البيوت واتقاء الله في شركاء حياتنا كان من أولوياتنا.. كنا هنبقي أسعد كتير والله" .
بينما تقول الزهراء الدميري: "ديما أقول مفيش حاجة اسمها طبعي كده، التغيير سنة كونية في كل شيء، والناس على مر السنين معتقداتها وتفكيرها بيتغير، والانسان لازم يبقي سهل عشان يرتاح ويريح".
وتضيف أفنان سعيد: "أكيد الطرف التاني هيزهق لو فضل يشتكي من سلوك سيء عندي.. وأنا مطنشة أو مشغولة.. بعد فترة أكيد هيفقد الأمل فيا".
"الحب مش استغلال.. الحب محتاج مقابل علشان يعيش.. والتضحية علشان طرف مبيقدرش حاجة صعبة جدا"، هكذا عبر عمر محمد عن رأيه في هذه العبارة.
وترى الدكتورة دعاء راجح الاستشارية الاجتماعية والأسرية أن عبارة "لو بيحبني هيستحملني زي ما أنا" هي اعتقاد سائد بين الشباب أن من يجب يجب أن يحب الطرف الآخر بعيوبه ومشاكله.
وأضافت: "ودا حقيقي، لكن دا بيحصل في المرحلة الأولى من الارتباط، مرحلة الانبهار واستصغار العيوب، وبتكون مش شايفها وحاسس أن فيه مميزات تانية كتير".
وتابعت عبر صفحتها على فيسبوك: "لكن في مرحلة تانية طبيعية جدا بتحصل بعد الانبهار دا، العيوب دي بتظهر على حقيقتها وبيظهر حجمها الطبيعي، ومحتاج علشان يستمر حبه ليك أنك تعالجها، وخاصة لو العيوب مؤذية ليه".
وأوضحت راجح: "مفيش حب هيستمر مع دوام الإيذاء ليه، أو تجاهل احتياجاته ومشاعره، مفيش حاجة اسمها حبني زي ما أنا كده"، لافتة إلى أنه "ما ينفعش واحد لما يتعصب يؤذي بالكلام الجارح والشتيمة وقلة الأدب وعايز مراته تستمر في حبه وهو على حاله كده".
واستطردت الاستشارية الاجتماعية: "ما ينفعش واحدة شكاية طول النهار تشتكي من الشغل والبيت والأولاد ومصدعة دماغه بشكوتها التي لا تنتهي وتقول لازم يحبني كده.. ما ينفعش واحد مش حاسس أصلا بوجود مراته في حياته إلا لما يكون عايز يأكل أو ينام معاها ويقول تحبني على طبعي كده".
وأضافت: "ما ينفعش واحدة ما تحسش بجوزها إلا لو عايزه منه فلوس، مش مهم تعرف هو معاه والا لأ، والا هو بيجيبها منين وازاي وبيتعب أد ايه وتقول لازم يحبني بعبلي كده".
وأشارت الاستشارية الأسرية إلى أن "الحب من طبيعته أنه سهل جدا يموت ويدفن.. محتاجين جهد متواصل علشان يستمر ويفضل عايش، مفيش حاجة اسمها هو المفروض يحبني كده".
وأنهت راجح حديثها بأن "مجرد محاولاتك في تغيير نفسك حتى لو نجحت مرة وفشلت مرات هتكون محل تقدير من الآخر، وأكيد مع الوقت والصبر على نفسك هتنجح في إحداث التغيير الذي يتمناه الآخر".
اقرأ أيضا:
