"حارس الممر".. رواية جديدة لمحمود العشري

تستعد دار أكتب للنشر والتوزيع ﻹصدار رواية "حارس الممر" تأليف محمود العشري.

ومن أجواء الرواية:-

- أنا سيرمادي، اسمي سيرمادي، وظيفتي واحد من حُرّاس الممر.
قال مدحت جملته, وهو يعتدل على كرسيه واضعًا قدمًا على قدمٍ في مشهد ينقصه صولجان مَلِكٍ ليزيد من هيبته، فيما كان ينظر إليه مصطفى في تعجُّبٍ مليءٍ بالرعب, وهو يجاوبه بصوتٍ مكتومٍ يكاد لا يُسمع:
- إيه؟ ممر إيه ومين ده؟ أنا مش فاهم، إنت مين؟
أجابه سيرمادي, وهو يقف ليتحرَّكَ في بُطءٍ حول منضدةٍ خشبيةٍ كبيرة في منتصف الصالة:
- في العالم التاني، عالم ما بعد الموت وظيفتي أنا وملايين غيري هو حراسة الممر.
- ممر إيه؟
- الممر اللي بينقل الروح من دنيتكم اللي عايشين فيها لدنيتنا اللي هتعيشوا فيها.
نَظَرَ إليه مصطفى في دهشةٍ, وهو فاتح فمه دون أن يُجيب، وأخذ يستمع إليه, وهو يُكمل حديثَه:
- روحك يا بني آدم لما بتموت بتطلع من جسمك في أرواح بتاخد الممر اليمين, وده ليه حراسة، وفي أرواح بتاخد الممر الشمال وده بتاعنا إحنا، مهمتنا هو الدخول, والتوحُّد جوا الروح دي لحد نهاية رحلتها في آخر الممر ووصولها لبوابة الدنيا اللي هتخلد فيها.
- جهنم؟
- إيه، اتفاجئت ولاّ إيه؟ إوعى تكون فاكر نفسك هتدخل الجنة!

الصفحه الرسميه للكاتب محمود العشري

محمود العشري كاتب مصري من مواليد 1984، حاصل علي بكالوريوس تجاره جامعة القاهرة، بدأ في كتابة أول أعماله عام 2014 و هي "رواية الدليل" من أدب الطفل و المغامرات و حصل عنها على المركز التاسع في مسابقة حورس الإسكندريه للسرد العربي علي مستوي الوطن العربي .