باسم يوسف: الدولة تشجع إعلامها على استخدام ألفاظ لم أجرؤ عليها في "البرنامج"

قال الإعلامي باسم يوسف، أن إيقاف برنامج "البرنامج لم يكن بسبب استخدام ألفاظ غير مناسبة، على حد تعبيره.
 

وأضاف "يوسف" في تدوينة عبر صفحته الشخصية بموقع التواصل الاجتماعي "فيس بوك":  "ايام ما كان مدعي الفضيلة والاخلاق بيتهموا البرنامج انه بيقول الفاظ ونكت ابيحه، كانت اكتر حاجة بنقولها هي كلمة "..." و حتى دي كنا بنحط عليها "تيت" . ٩٩٪ من التيت اللي كنا بنقوله ده كانت كلمة "..." اللي كان "بتأذي" المشاعر المرهفة للمشاهدين".
 

وتابع: "تمر الايام واتفرج على البرامج اللي موجودة دلوقتي و الاقي "..." بتتقال عادي من غير "تيت" زائد ايحاءات اكتر من اللي كنا بنقولها. كل ده مفهوم لان البرنامج ما كانتش المشكلة بتاعته هو ايحاءات ولا الفاظ دي كانت مجرد حجة".
 

وأضاف: "بس من يومين شفت اسكتش لساترداي نايت لايف بالعربي ولقيتهم بيرموا افيه على احمد موسى وبيحطوا "تيت" على اسمه. فعلا؟ السقف وطي للدرجة دي؟!".
 

وواصل: "انا مش بالوم اللي بيشتغلوا في البرنامج ده او غيره زي ابلة فاهيتا او بقية البرامج الكوميدية. بالعكس البرامج دي فعلا فيها اكتر ناس موهوبة في مصر وحزين اني ماكانش عندي الفرصة اني اشتغل معاهم، لكن لما يوصل الموضوع ان الدولة ما تستحملش كلمة مش على الرئيس او السلطة او الوزراء لا، على واحد من الإعلاميين اللي رمتهم الدولة علينا، واحد "..." والمؤيدين عارفين انه "..." وهو نفسه عارف انه "..."، يبقى فعلا ربنا يكون في عون اي حد كراييتف وبيحاول يكتب كوميديا في البلد دي".
 

واختتم  "على العموم شكرا للدولة انها كبرت ونضجت وما بقتش تتكسف من كلمة "..." وشكرا ليها مرة تانية انها اخيرا عرفت ان احمد موسى شتيمة ابيحة".