تامر أبو عرب عن كلمة السيسي في أسوان: سيبك من الشعب وركز في حكومتك

وجّه الإعلامي تامر أبو عرب رسالةً للرئيس عبدالفتاح السيسي بعد كلمته اليوم خلال انعقاد مؤتمر الشباب بمحافظة أسوان.

وقال الرئيس إن إصلاح التلفزيون المصري يحتاج وقتا وتكاليف وجهدا، وأضاف: "مسؤولية النمو مشتركة بيني وبينكم، من سنتين كلمتكم عن الزيادة السكانية، قبل ما تسألوني عملت إيه إنتم عملتم في اللي عليكم إيه؟".

وعلّق "أبو عرب" على حديث الرئيس، وكتب عبر حسابه الشخصي على "فيس بوك": "السيسي كل يوم بيخترع نظرية سياسية واقتصادية جديدة ماشاء الله. آخر نطرية اخترعها هي نظرية "خير وسيلة للدفاع الهجوم" اللي هو بدل ما أقعد أبرر وأدور على أسباب للمشاكل ومش هلاقي برضه أروح قالب الموضوع فالناس تتوتر ومتفهمش حاجة فتسكت".

وتابع "أبو عرب": "النظرية دي بدأ تطبيقها النهاردة لما قال للشعب في كلمته في أسوان: " قبل ما تسألوني عملت إيه إنتم عملتم في اللي عليكم إيه؟"، يعني اللي العالم كله يعرفه إن الشعب هو اللي بيسأل الحاكم عمل إيه، ولما يكون الحاكم مستبد جدا بيخلي الناس تسكت تخاف تسأله عملت إيه، لكن الحركة دي بقى جديدة لانج، أول رئيس في مجرة درب التبانة هو اللي يحاسب الشعب ويسأله عملت إيه؟ وطبعا لو معجبوش الشعب هيغيره في الانتخابات الجاية ويختار شعب تاني، أيوة بقى هي دي الديمقراطية".

وأضاف تامر: "الجديد برضه إنك لما تسأل الرئيس أو حتى الحكومة عملت إيه فده ممكن، ٢٠ ولا ٣٠ واحد سهل تسمع ردهم، لكن لما حضرتك تسأل الشعب كله مستني ٩٠ مليون واحد يردوا ازاي؟ يعملوا مؤتمر صحفي مثلا ويبدأ واحد واحد يتكلم ويقول عمل إيه في ملفات الصحة والتعليم والعدالة الاجتماعية وكدة؟".

مستطردًا: "مفهوم طبعا إن السيسي من ساعة ما جه وهو مش شاغله خالص إنه يشتغل قد ماشاغله إن الناس تشتغل ومتنامش وتستحمل وتستغني عن الرفاهية وبعض الأساسيات كمان، لكن طبعا الكلام ده مش موجه ليه، هو عادي يتفسح على الكورنيش ويركب حنطور ويعيش حياته عادي، هو انتوا جايبيني هنا علشان تعذبوني وللا ايه؟".

وأكمل "أبو عرب": "بس اللي ميعرفوش الرئيس إن الشعب هو الوحيد اللي عامل اللي عليه في المنظومة، لو مش علشان بلده تعلى فلسبب بسيط جدا، إن المواطن لو مشتغلش بإيده وسنانه واشتغل بدل الشغلانة اتنين واحيانا أكتر آخر الشهر هياخد عياله ويقفوا علي باب جامع يقولوا لله وبرضه مش هيلاقوا ياكلوا لأن محدش قادر يديهم".

مختتمًا حديثه: "فياريت ياريس تسيبك من الناس وتركز في نفسك وحكومتك انت، لأنكم لو اشتغلتوا ربع الشعب ما بيشتغل كان الحال بقي غير الحال".

وانطلقت اليوم الجمعة، في محافظة أسوان، فعاليات المؤتمر الوطني الثاني الشهري للشباب تحت شعار "أبدِعْ.. انطلق"، بمشاركة الرئيس عبد الفتاح السيسي، والذي حرص أن يصل قبل المؤتمر بأيام للتنزه في أسوان، كما شاهد مباراة مصر وغانا وسط مجموعة من شباب أسوان.