بالفيديو| ابنة سيد حجاب تنهار أثناء قراءة أشعاره
ملامحها تخبر الناظر إليها أنها نجلة شاعر العامية الراحل سيد حجاب، فقد ورثت صفاته الشكلية، كما ورثت حبها للشعر والفن، عندما تنظر إليها ستخبرك عيناها وملابسها السوداء أن الحزن مازال متمكنا من قلبها على فراق والدها، إنها الفنانة الشابة ريم حجاب.
دخلت ريم في موجة بكاء حادة عند قراءتها لقصيدة "أنا ابن بحر" من ديوان "صياد وجنية" للشاعر الكبير سيد حجاب، فلم تتمكن من السيطرة على دموعها التي انفجرت حزنًا على فراق والدها، وذلك أثناء أمسية "ليلة في حب سيد حجاب" بالمجلس الأعلى للثقافة لتأبينه.
وتقول كلمات القصيدة:-
أنا ابن بحر.. ابن بحر.. ابن بحر
إبن النسيم اللى رضع من السما
رضع حليب النجمة
حنيه وفجر و بعدها جه واترمى
فى حضن أبويا وأمى واخواتى الكتار
خلانا نفهم بالوما خلى خيالنا يمد إيده
يطول شماريخ السما وحتى لو حبيت أقول:
إن النجوم فى المية عايمة مسهمة
وإن خطوة ناس بلدنا الطيبين متنغمة
وإنهم كلمة محبه فى الهدوم متقسمه
ومهما أقول ما ينتهى لى بحر قول
دا البحر جنى لو أمد إيديا أطول شمس كتير
شموس أصيل البحر يوماتى بتنعس شمس فيه
أقدر أجيب الشمس نعسانه
تملينى الكلام كلام بيتنفس سلام
وعرايس البحر ف بلدنا كتار.. كتار
وف قلب كل عروسه منهم.. بحر شعر مالوش قرار
دا عرايس البحر ف بلدنا..اخوات عرايس الشعر.
واخوات القمر.. واخواتى..
..واخوات ناسى واخواتى الكتار
أنا ابن بحر إبن بحر..إبن بحر..
وزى ما يلف الحنش كل البحور
ويدور مع ايام الشهور ويدور مع شهور السنين.
وبعدها يرجع على موجة حنين زى الحنش ما يلف..لفيت..
زى ما يرجع رجعت. دقت الحياه جعت و شبعت
دوامه شدتي.. مع الدوامه ضعت
ونزفت دم الفرحه فوق طين الزمن
ورجعت فوق كتفى الكفن
علشان أموت فى وسط ناسى الطيبين
أول ما دقيت باب بلدنا بلهفتى
لقيت أخويا.. مصغر الغيط إسماعين
نايم فى جوف جلابيتى أهو..فز م النوم.. اتفزع
واخذنى فى أحضان الحنين قلبى اتمزع
ساعة ما شفته بدراعينه.. مفرودين زى الصليب
يا مصغر الغيط..أه يا ولداه انصلبت
من قبل ما تعرف حياة الطفل شبت
حولت عينى عنه حسيت بالدموع
فى حلق أبويا وأمي وإخواتى الكتار
حسيت فى حلقى قطر نار
بصيت من الشباك هناك
بصيت لباقى الناس لقيتهم فى الطريق متشنقين
حوالين رقا بيهم شباك وبرضه ماشيين ميتين
حولت عينى للسما ياميت ندامه..
دى السما متلغمه بنجوم كتير
عيون عيون صفرا بتضحك للعمى
جدير بالذكر أنه حضر الأمسية الكاتب الصحفي حلمي النمنم، وزير الثقافة، والدكتور هيثم الحاج علي، القائم بأعمال المجلس الأعلى للثقافة، الفنان علي الحجار، عصام شرف، رئيس الوزراء الأسبق، وخالد عبدالجليل رئيس المركز القومي للسينما واللواء حسن خلاف رئيس قطاع مكتب وزير الثقافة، الناقد أحمد حسن والناقد محمد عبدالمطلب وميرفت الجسري، أرملة حجاب، ونجلته ريم حجاب، والناشط السياسي جورج إسحاق.
