خالد داود للسيسي: «إدينا مرتبات تخلينا نعيش زي البنى آدمين وبعدين حاسبونا»

علّق خالد داود، رئيس حزب الدستور، على حديث الرئيس عبدالفتاح السيسي خلال افتتاح عدد من المشروعات بمحافظات الصعيد على هامش زيارته لمحافظة قنا اليوم.

وكتب عبر صفحته الشخصية بموقع التواصل الاجتماعي"فيس بوك": "قبل ما السيسي يسأل إذا كان في بلد في العالم بتقدم خدمات عامة بأسعار منخفضة زي مصر، يا ريت برضو يفتكر إن حوالي 40% من المصريين تحت خط الفقر وزيهم عند خط الفقر، وإن بسبب سياساته المصريين افتقروا زيادة وحتى الخدمات الأساسية ما بقوش قادرين عليها".

وأضاف: "ادينا مرتبات تخلينا نعيش زي البنى آدمين، وبعدين حاسبونا على الخدمات"، متسائلًا في الوقت ذاته: "هو حضرتك مش معانا من البلد دي برضو يا ريس؟".

وأكد الرئيس عبدالفتاح السيسي، اليوم الأحد، على ضرورة تقديم الحقائق كاملة للمواطنين دون أي مواربة، وقال: «مستوانا بقى كده لأن الحقائق مش بنقولها كما ينبغي».

وقال الرئيس موجهًا حديثه للمواطنين: «والله العظيم أنا صادق معاكم في كل كلمة بقولها، ودماغي مع زمايلي (الوزراء) في كل حاجه بتتعمل». وأضاف: «قولوا للناس واشرحوا لهم واربطوا المواضيع ببعضها»، في إشارة إلى ما تتكلفه الدولة لتقديم الخدمات للمواطنين.

وعلق السيسي على رفع أسعار وسائل النقل والمواصلات، وقال: «(المواطن) بيقولي أنا غلبان مش قادر.. وأنا كمان غلبان مش قادر». وأضاف: «مفيش خدمات في العالم بالتكلفة اللى احنا بنعملها دي.. لو استمرينا كده ح تنهار مرافق الدولة مرفق ورا مرفق.. والقروض ح تدفع منين؟!».