رأى المحلل الاقتصادي عمر الشنيطي، أن الأزمة الاقتصادية ستتفاقم بشكل كبير في الفترة القادمة، مما سيؤثر بشكل سلبي على العلاقات الأسرية والاجتماعية.
وقال الشنيطي في تدوينة عبر صفحته الشخصية بموقع التواصل الاجتماعي "فيس بوك": نصيحة للعائلات المصرية.. الفترة اللي جاية هتكون صعبة جدًا من الناحية الاقتصادية. مستويات ارتفاع الأسعار هتكون غير مسبوقة. الناس دلوقتي بتشتكي من الأسعار ومتصورة إن اللي حصل في آخر كام شهر ده جنان لكن للأسف الفترة اللي جاية هتكون أسوأ مع القرارات المرتبطة بقرض صندوق النقد اللي أصبح لا مفر منه. الكلام ده هيأثر على القوة الشرائية للناس اللي هتنخفض بشدة أكتر من الوضع الحالي".
وتابع: "للأسف كتير من الرجالة في مجتمعنا بياخدوا الموضوع على صدرهم ومن القرف يطلعوا الكلام ده على بيوتهم وولادهم وده هيكون سبب لحالات انفصال ومشاكل أسرية من القرف وضيق الحال. الراجل العاقل هو اللي يجيب مراته وولاده ويفهمهم الوضع ويقعد يفكر معاهم إزاي يقللوا المصاريف بشكل عام. التظاهر بالقوة والسيطرة مش مفيد لكن الصراحة والمشاركة هي الحل".
وواصل: "مش عيب إن الراجل يدور على شغل تاني جنب شغله الأساسي حتى لو الشغل ده يبدو أقل في المكانة الإجتماعية من وظيفته الأساسية. ومش عيب كمان إن الست اللي قاعدة في البيت تحاول تشتغل أي شغلانة أو حتى تطبخ وتبيع أكل، لو بتعرف تطبخ طبعا ، وكمان مش عيب إن الأولاد اللي في الجامعة سواء ولاد أو بنات يحاولوا يشتغلوا عشان يساهموا في البيت حتى لو بمبلغ بسيط".
واختتم: "الخلاصة إن الفترة اللي جاية هتكون صعبة على الكل والأفضل إن الناس تدرك ده وتستعد له بدل ما تصب قرفها من ضيق الحال على بيوتها وولادها".
وتعاني البلاد نقصاً حاداً في العملة الصعبة، نتيجة تراجع إيرادات السياحة، والاستثمار الأجنبي، والصادرات، وتحويلات المصريين العاملين في الخارج.