علق الإعلامي الساخر باسم يوسف، على حادث اغتيال السفير الروسي بالعاصمة التركية أنقرة.
وقال في تدوينة مطولة عبر صفحته الرسمية على موقع التواصل الاجتماعي "فيس بوك": "التعليقات على قتل السفير الروسي لطيفة قوي، ناس جميلة بتستخدم آيات وأحاديث وأسانيد من السيرة والسنة والقرآن عشان تثبت إنه "أصلاً عادي" وإزاي إن اللي حصل ده مشروع و"شرعي" وإن إزاي السفير ده ما يمشيش عليه حكم الرسل التي لا تقتل وكده".
وتابع: "بحب أنا كلمة "شرعي" دي قوي، أنا فاكر لما داعش ظهرت كده وبدآت تدبح الناس وتحط الرصاص في دماغ ناس تانية وتقطع أيادي ناس تالتة وتحرق الطيار الأردني، انا فاكر في الوقت ده كانت فيه تعليقات جميلة قوي.. "لا طبعًا الدين بتاعنا دين تسامح ومحبة وده شئ مرفوض ولكن..".
وأضاف: "بعد لكن دي بقى تلاقي بلاعة اتفتحت،، بلاعة علم وأصول شرعية طبعًا، يعني حاجة كويسة إن شاء الله، بعد "لكن" هما بيقولوا إن اللي بيحصل ده غلط، بس مش غلط قوي، أه طبعًا نقطع ونحرق ونجلد، بس يكون فيه "ضوابط شرعية" و"أهل العلم" و "ولي الأمر" هو اللي ليه إنه يقرر مين اللي نرجمه ومين اللي نذبحه، مش متسابة كده يعني، وطبعًا لازم يكون في سبب "شرعي" وطريقة "شرعية" وإن في أصول وشروط".
وواصل: "طبعًا من شاء فليؤمن ومن شاء فليكفر، بس اللي كفر أو ارتد ده فيه طريقة "شرعية" للتعامل معه، و لو وصلت للجلد أو القتل، لازم نكون اتبعنا كل الطرق "الشرعية" يا جماعة، نفس الموضوع بالنسبة لتارك الصلاة والمجاهر وناس تانية كتير مش عليهم إجبار ولا حاجة بس إن شاء الله لما تتوفر الشروط والظوابط "الشرعية" يبقى الواحد كده يعاقبهم بشرع الله وهو مستريح الضمير".
وذكر: "فطبعًا في دولة إسلامية محترمة حنشوف إزاي ناس لطيفة زي الحويني وحسان وبقية شلة "أعلم أهل الأرض" حتقرر مصيرنا إزاي وده طبعا بشرع ربنا عشان أنا مستني واحد شيخ يفتيلي أجلد وادبح واقتل إزاي بطريقة ربنا يكون فيها راضي عني إن شاء الله، طبعًا شيوخنا ضد تفجير الكنايس، بس الكنايس أصلاً إيه اللي وداها هناك، دول عبدة صليب ومش المفروض نبنيلهم كنيسة أصلاً، احنا طبعًا متسامحين مع اخواتنا المسيحيين لكن مش بنحبهم، لأن "شرعيا" فيه حاجة اسمها ولاء وبراء، فبحبهم، بس مش باسوق فيها قوي عشان حرام طبعًا، إيه نحبهم دي كمان؟ فوضى هي".
وأردف: "العقلية المسيطرة بتاعة إن العالم كله ضد الإسلام وإن ربنا زكاك عن بقية البشر عشان صدفتك وقعتك إن البويضة اللي جابت جنابك اتلقحت في عيلة مسلمة فطبعًا انت مولود أحسن من كل البشر، دي عقلية جميلة قوي، ليك كل الحقوق وليك إنك تصرخ وتصوت وتولول على الظلم الواقع عليك بس بقية البشر دول أصلاً رايحين النار، فايه المشكلة إننا نساعدهم يروحوا هناك أسرع؟، المهم كله بالضوابط الشرعية وكله بالأصول وكله بما يرضي الله، هو يا جدعان فيه حاجة ترضي ربنا أكتر من إننا نقتله بقية خلقه بالنيابة عنه؟".
واختتم: "مش معنى كده إن الواحد موافق على قتل الناس في سوريا وحلب، واللي بيحصل هناك جريمة، بس الواحد ما يفرحش بقتل ناس عزل عشان متضايق إن فيه ناس عزل تانيين بيتقتلوا، ماهو مش معقول يعني كل لما نتكلم عن حاجة سيئة في العالم يطلع الفلاليط دي يكلموناعن سوريا والعراق وليبيا، طب و الباكستاني اللي قتل ١٢ واحد بعربية نقل؟ إيه النظام؟ أه طبعا دول ألمان، بيضربوا حلب هما كمان؟ لا دول كفار عادي فيموتوا".
واغتيل السفير الروسي بأنقرة، بعد تعرضه لهجوم مسلح مساء أمس الاثنين، خلال إلقائه كلمة، في افتتاح معرض فني بالعاصمة التركية، وتم تصفية القاتل في لحظتها.