يعاني الرجل من مشاكل متعددة بسبب عدم فهمه لطبيعة المرأة، ويواجه صعوبة بالغة في الوصول إلى قلب المرأة، الأمر الذي ينغص عليه حياته الأسرية. فمن أجل حياة زوجية سعيدة يجب أن يفهم شريك الحياة الطرف الآخر، حتى تستقر حياة الأسرة، وتعبر إلى بر الاستقرار بأمان.
وفيما يتعلق بالوصول إلى قلب المرأة، قالت الدكتورة دعاء راجح الاستشارية الاجتماعية والأسرية: "الرجال في فهم المرأة أنواع؛ فيه رجل يعتقد أن أقرب طريق إلى قلب المرأة المال والمنظرة بماله وإمكانياته المادية أو مال أبوه وأهله، ودا بعد الزواج لا يعطي إلا المال".
وأضافت راجح عبر صفحتها على فيسبوك: "وفيه واحد يعتقد أن أقرب طريق للبنت هي كلمات الحب والغزل، ومن تالت شات بينهم يقولها بحبك، ومنتظر منها تنهار وتقع في حبه علطول، ودا غالبا بعد الجواز بينكتم تماما؛ لأنه خلاص كسب قلبها وحقق الهدف".
وتابعت الاستشارية الاجتماعية: "وفيه واحد فاكر أن أقرب طريق هو الوسامة والشياكة، وأنه يفهمها أن البنات كلهم بيجروا وراه وأنه اخترها دونا عن كل البنات، فدا غالبا هيفضل كده بعد الزواج لأنه مستمتع بالحرب عليه".
وأكدت راجح أن هناك "واحد تاني فاكر أن البنات دول كائنات جنسية تموء في موسم التزاوج، وجل بحثها عن رجل قوي جنسيا، ودا هتلاقيه يصرخ بعد الزواج أنا بديها كل حقوقها الشرعية عايزه إيه بعد كده".
وأوضحت: "وفيه واحد يعتقد أن أقرب طريق للبنت الجدعنة فيبدأ يعمل عليها حركات جدعنة علشان يثبت لها أنه راجل بجد، وبعد الزواج تلاقيها رايحة للدكتور لوحدها، ويمكن بتولد ولا تعمل عملية لوحدها".
وأشارت راجح إلى أن "فيه واحد فاكر أن البنات تحب الي يتحكم فيها ويسيطر عليها، ويعمل عليها راجل بتعليماته وانتقاداته، ودا هتلاقيه يطلع عينها بعد الزواج".
ولفتت راجح إلى أن "الرجل الي حاطت في مخه فكرة معينة عن البنات، وماشى بيها مع الجميع في بحثه عن بنت الحلال لو نيته كويسة أو في توقيع البنات لو نيته سيئة؛ الشخص دا بيبقى ضيق الأفق، وسبحان الله يفشل المرة تلو المرة لحد ما يقع في البنت الي تؤكد أفكاره بالفعل والي عندها نفس الأفكار، فالطيور على أشكالها تقع".
ووجهت الاستشارية الأسرية حديثها للرجل قائلة: "يا سيدي الفاضل النساء مختلفات، ومفيش حاجة اسمها أقرب طريق إلى قلب المرأة، زي مفيش حاجة اسمها أقرب طريق إلى قلب الرجل، كل شخصية ولها مداخلها".
وأضافت راجح إلى أن بعض الشباب يشكون "خطيبتي مش بتحبني ومش عارف أتقرب لها ازاي، ويشكو المتزوجون أنا بجيب لها كل الي هي عايزاه لكن برده مش حاسس بحبها لي"، لافتة إلى أن "الوصول إلى القلوب فيه بدائل ووسائل متعددة، وكل واحدة ولها مدخلها على حسب احتياجاتها وقناعاتها وتربيتها وثقافتها واختياراتها".
وعن الحل أكدت راجح أن "الراجل المنفتح الي مداركه واسعة بيحاول يفهم الي قدامه الأول ويسمع منها؛ علشان يوصل لأكتر حاجة هي محتاجاها أو أكتر حاجة هي بتنجذب لها. عايز توصل لقلبها ركز على ما تطلبه منك بشكل صريح مهما كنت حاسس أنه حاجة تافهة لا تقارن بما تقدمه لها".
وتابعت: "لو هي نفسها مش عارفة هي عايزه إيه، ابحث واستمع إلى تاريخها في بيت والديها وشوف هي ممكن تكون اتحرمت من إيه هتلاقي الي هي عايزاه..أو أكتر حاجة هي محتاجاها منك، ولو برده مش قادر جرب وسائل متعددة وابحث على الإنترنت على البنات عايزة إيه، وشوف رد فعلها وفرحتها هتكون أكتر بإيه بالضبط".
وأشارت راجح إلى أم "البدائل للوصول للهدف متعددة فبلاش تتربس، وتصمم أن الطريق الوحيد لقلب مراتك أنك تأكلها وتلبسها وتسترها في بيت؛ لأنها مكانتش محتاجة الحاجات دي في بيت أهلها، هي متجوزاك لاحتياجات أخرى تماما لو مش هتلبيها هتفضل طول عمرها مبوزة ونكدية ومش سعيدة"، مطالبة الرجل "فتح مخك تأكل ملبن، والكلام للنساء كذلك".