استنكر علي حسن، صاحب ديوان "خمسة خصوصي"، هجوم رواد مواقع التواصل الاجتماعي عليه بسبب ما وصفه البعض بسطحية محتوى الكتاب.
وقال في تدوينة عبر حسابه على موقع التواصل الاجتماعي "فيس بوك": "بسم الله الرحمن الرحيم، أنا مش شايف نفسي أصلاً في مجال دفاع عن نفسي، ولكن هقول الكلام دا عشان الناس اللي بتحبني اللي بتبعت لي تقول لي رد، وعشان أهلي اللي انعرضوا لشتيمة بسببي، وبسبب ناس أهلها مش موجودين أصلاً أو مش فاضيين لهم".
وتابع: "أولاً بخصوص كتابي خمسة خصوصي نازل في أواخر 2014، جزء أسامي البنات دا معمول للبنات في جزء اسمه بناتي جداً، ومعمول بناء على طلب الناس اللي هي نفسهم بيشتموا وبيشيروا، لما بفتح مسدجات بيني وبين حد فيهم بلاقيهم باعتين لي مسدج عاوزين اسمهم، وبناء على إن كان بييجي آلاف الكومنتات بتطلب أساميها".
وأضاف: "تاني شئ بخصوص المقطع اللي عن الخدود دا من جزء اسمه ضحك في حب، ودي قصتها أصلاً ملهاش علاقة بالكلام الفارغ اللي بيتقال دا وقلة الأدب دي لأن اللي قريبين مني عارفين مين علي وأخلاقه كويس قوي وعمر ما حد مسك عليا حاجة ولا يعرف، دي كنت بهزر بيها مع أختي وموقف بسيط".
وواصل: "تالت حاجة فيه حاجات كتير تنسب للكتاب وليس لها وجود من الأساس زي بتاعة صباعك و بوسة ولابسة إيه و قلة الأدب والهبل دا، رابع حاجة أنا كنت منزل الكتاب دا للترفيه فقط ومن أجل إسعاد الناس، ولا يندرج تحت أي قواعد أصلاً، و أنا دايماً بحب أعمل الحاجة المختلفة، وإن شاء الله باي بولر هو أنا وبيحقق هيحقق أكتر من اللي بحلم بيه".
واختتم: "آخر شئ هو إن كل البرامج و الصحفيين اللي بيكلموني آسف أنا مش في مصر أصلاً وهرجع يوم 13 إن شاء الله، وفي الآخر حسبي الله ونعم الوكيل في كل حد أذاني أو اتعرض ليا بكلمة وبقولها، وأنا في أطهر مكان في الدنيا، ربنا ينتقم لي وياخد لي حقي .. شكراً".
وأثار ديوان يحمل اسم "خمسة خصوصي" لشاب يدعى علي حسن، عن دار نشر "ليان"، سخرية مستخدمي موقع التواصل الاجتماعي "فيس بوك"، لسطحية محتواه وأسلوب الكاتب.
الديوان احتوى على قصيدة بدأت بـ "هبة يا هبة إنتى الحكاية الطيبة، إنتى اللى عمرى فداكى كله ونفسى تبقى قريبة"، والشاعر اعتمد كتابة عدة قصائد بأسماء بنات مختلفة.