على أبواب المدارس وفي إشارات المرور وبالميادين العامة بالإسماعيلية انتشر باعة الورد تزامنا مع احتفالات عيد الأم، فبخمسة جنيهات فقط يمكنك أن تهدي لأمك باقة صغيرة من الزهور الملونة تعبر فيها عن تقديرك وحبك .
ويقول أحمد عبدالله بائع متجول "لكل وقت أدان وانهارده أدان الورد في عيد الأم ....كل مناسبة لها بضاعتها ولها ناسها وانهارده يومنا أدام المدارس في مواعيد خروج الطلبة "
وتابع "أنا مش بخترع ولا حاجة أنا بس بشغل دماغي أهي وردة ملفوفة في ورقة كورشيه ملونة وعليها شوية ملمع وبنبيعها ب5 جنيه .هدية حلوة وسعرها على أد العيال وبتفرح الأمهات"
ومن جانبه قال حمزة محمد 9 سنوات "أنا أشتريت لماما مع إخواتي هدية بس لما شوفت الورد جبت لها وردة عشان أنا عارف إنها بتحب الورد "
وقالت ألاء محمد 13 سنة "الورد ده أجمل هدية ماما بتحبها "ووافقتها الرأي أروى وميار ونوران .
وأضاف محمد وائل 14 سنة: "الورد اللي بيتباع أدام المدارس دبلان ومش ورد بلدي ولا له ريحة ..لكنه شكل ولون وسعره رخيص عشان كده العيال بتروح تشتري منه .وتهدي للمدرسات منه "
فيما قال حامد محمود بائع للزهور بالإسماعيلية "رغم أن للورد لغة لكن لم يعد الإقبال على شراءه كما كان في الماضي للتعبير عن الحب في عيد الأم .وبات بوكيه الورد عادة قديمة لا يحرص عليها إلا أصحاب الذوق الرفيع "
وأكد أن بوكيه الورد أصبح حالياً مرصعاً بقطع الشيكولاته حتى يلفت الإنتباه ويصل سعر بوكيه الورد بالشيكولاته لأكثر من 100 جنيه حسب نوعية وكمية الشيكولاته المتواجدة بالبوكيه ".