كشفت منار الطنطاوي، عن معاناة زوجها الكاتب الصحفي هشام جعفر، داخل سجن العقرب.
وقالت في تدوينة عبر حسابها على موقع التواصل الاجتماعي "فيس بوك": "رحت الزيارة ومش هتكلم على أي حاجة غير لحظة لما شفته قلبي اتخطف، وجه شاحب وحوالين عينه أسود وشفايفه بيضاء ووجه كله مفيش مكان فيه من غير ما الناموس قرصه".
وتابعت: "أول ما اتكلم قالي أنا تعبان واللي بيحصل إهمال طبي متعمد وتجويع متعمد مش بيرضوا يدخلوا أكل في الزيارات والأكل بتاعهم بايظ وبيجيب تسمم، قلتله أنا سمعت إن العدس والمسقعة كل اللي أكلهم تعب انت أكلت قالى لا، بس هما قاصدين كل حاجة بتم بقصد وتعمد، اكتبى عن اللى شفتيه ومتسكتوش ومتخافوش وإن شاء الله لو قعدت 50 سنة مش هيهمني".
وأضافت: "قولي لكل الناس اللي بيحصل قوليهم إننا بنموت بالبطيء قوليلهم إن مش هشام لوحده كل الناس اللي في السجون، قلتله ربنا كشفهم بحالة أحمد الخطيب، قالي ـحمد طلع عنده إيه، قلتله مرض من ذبابة الرمل، قالي يعني اللي عند أحمد كان من عدم النظافة، قلتله أيوة والناس كلها بتتكلم علشان يتعالج لأنه بيموت، قالي هتسمعوا عن آلاف زي أحمد من إصرارهم على عدم الرش، لما بيرشوا الناموس بيخف وهما رافضين".
وواصلت: "هشام حملني أمانة إنى اتكلم ومسكتش، بس أنا فعليًا معنتش عارفة أعمل إيه أكتر من اللي بعمله، معنتش عارفة البلد دي عايزة مننا إيه وبتعمل فينا كده ليه، هشام بيجيله احتباس في البول وقالي مش بتكلم علشان الدكتور اللي هنا المرة اللى فاتت ركبلي القسطرة غلط، ونزفت والقسطرة بقت تجيب دم، مش عايز اتبهدل، قلتله طيب ـنا جبتلك الدوا معايا يارب يدخل قالي الدوا معدش بيعمل معايا حاجة والسبب الوحيد اللي كان مصبرني في مستشفى الليمان إني لما بتعب بيعرفوا يركبوا القسطرة من غير بهدلة".
واختتمت: "النهاردة منعوا الأكل يدخل لهشام دخلوا 2 صباع موز والدواء فقط، أنا جيت تعبانة جدًا ومكلتش من الصبح، حطيت الأكل وجيت أكل معرفتش ابلع، مش عارفة هكمل يومي والأيام اللي جايه إزاى وأنا كدة، مش هكتب هاشتاج ولا هطلب من حد يعمل شير ولا عايزة أي حاجة من أي حد، عايزة بس ربنا يرحمنا من الغابة اللي عايشين فيها، عايزة في يوم يقولوا منار ماتت واستريحت".
وأعلنت وزارة الداخلية، أنها لا تمتنع عن الإفراج الصحي عن أحمد الخطيب الطالب بجامعة مصر للعلوم والتكنولوجيا، بعد تدهور حالته الصحية وإصابته بمرض الليشمانيا الحشوية.