رأى الإعلامي، تامر أبو عرب، أنه من المفترض أن يتم عمل صيغة موحدة من قبل كافة المعترضين على اتفاقية ترسيم الحدود، وإرسالها إلى كل عضو داخل مجلس النواب، لتحذيرة من مناقشة الاتفاقية.
وكتب عبر صفحته الشخصية بموقع التواصل الاجتماعي«فيس بوك»: «بما إن البرلمان بقى هو الثغرة الأخيرة اللي السلطة بتحاول إنها تمرر من خلالها اتفاقية ترسيم الحدود وتسلم تيران وصنافير للسعودية، فلازم الناس تاخد خطوة لقدام وتحط النواب دول قدام مسؤولياتهم ولو من باب التأريخ والتوثيق».
وأوضح: «ميزة البرلمان إن الطابع المحلي غالب فيه، يعني وانت بتقرا البوست ده وأيا كان مكانك في مصر فقريب منك مقر لنائب صوته هيحدد بشكل كبير مصير الجزيرتين، والوصول للمقر ده ومقابلة النائب نفسه سهل».
وأضاف: «فرأيي إن خلال الأيام الجاية تتعمل صيغة موحدة يتولى المهتمين بالموضوع جمع توقيعات ولو إلكترونية عليها بالاسم ورقم البطاقة برفض مجرد مناقشة الموضوع في البرلمان في ظل صدور حكم قضائي بات ونهائي بمصرية الجزر وبيطلب منه الحفاظ على قسمه اللي أقسمه بالحفاظ على سلامة والوطن ووحدة وسلامة أراضيه ويتم تسليمها للنائب ده مطبوعة في مقره علشان كل نائب يعرف إن الموضوع مش هيعدي بسهولة وإنه لو صوّت بالموافقة يبقى بيخالف رأي أهالي دايرته وبيشارك في التفريط في حتة من أرضه».
وتابع: «أنا عارف موقف كتير من الناس من البرلمان ده والطريقة اللي جه بيها، لكن في النهاية مطلوب من الناس تعمل أي حاجة لو كان نتيجتها إن الجزر تفضل مصرية، فإن لم يكن فالتوثيق وللتاريخ.. #تيران_وصنافير_مصرية»
وقضت محكمة مستأنف القاهرة للأمور المستعجلة، برئاسة المستشار أسامة صبري، الأحد الماضي ، برفض استئناف محامية على حكم محكمة بإسقاط حكم المحكمة الإدارية العليا ببطلان توقيع اتفاقية ترسيم الحدود البحرية، بين مصر والسعودية، التي تنتقل بموجبها «تيران وصنافير» لسيادة المملكة العربية السعودية.