افتتح الرئيس عبد الفتاح السيسي، اليوم الأحد، المرحلة الرابعة للخط الثالث لمترو الأنفاق، والذي يضم 10 محطات، بينها محطة عدلي منصور، والتي تعد الأكبر على مستوى الشرق الأوسط.
وقال الرئيس السيسي إن المشروعات التي يتم افتتاحها وتنفيذها في مجال السكك الحديدية ومترو الأنفاق ممولة بقروض، مضيفا :"واحنا مش عاوزينكم تسددوا القروض وفوايدها، ولكن عاوزينكم فقط تحافظوا على كفاءة المرفق إنه يشتغل ويدي الخدمة اللي تليق به".
وتابع السيسي: "اللي طلبه كامل مش انكم تسدوا القروض"، فرد الفريق كامل الوزير، وزير النقل، قائلا: "مصاريف التشغيل فقط يافندم"، فاستكمل السيسي حديثه قائلا: "انا عارف الناس هتفهمني كويس، وبأكده لأن مفيش خيار تاني، وإلا هنبقي بنبيع لكم الوهم ونقول عملنا وعملنا وبعد 5 سنين تلاقوا مبقاش صالح، لا يمكن نعمل كده ولا نبقى أمناء معكم لو سمحنا بكده".
واستطرد: "بالمناسبة مش الناس كانت بتتحرك باللي احنا هنفتتحه دا قبل كده من غير دا، يعني انتوا كنتم قادرين تتحركوا، يمكن بتعانوا يمكن، بتنفقوا اكتر يمكن، طب لما أنا أعمل حاجة حديثة بالشكل دا، تريحك وتساعدك وتليق بك، متقوليش متغليش، لأ، يعني كامل كان بيقولي 5، 7، لأ المظبوط".
وتدخل الفريق كامل الوزير ليوضح أن سعر التذكرة سيكون 10 جنيهات، فرد السيسي "لا لا، المظبوط، أنا اللي بقول المظبوط عشان نقدر نعيش، كل حاجة بتمنها، أو اللي نقدر نتحمله يا مصطفى".
وأشار الرئيس السيسي إلا أنه قد أكد على عدم زيادة أسعار تذاكر القطارات بالسكك الحديدية إلا بعد رفع كفاءاتها وتطويرها، مؤكدا أن العام القادم ستكون جميع القطارات بالهيئة والسكة الحديد نفسها سيتم رفع كفاءاتها بالكامل، وغير ذلك لن يطالب بزيادة تكلفة التشغيل قبل أن يتم التطوير كاملا.
وتعد محطة عدلي منصور، التي افتتحها السيسي اليوم، إحدى المحطات المركزية الكبري لربط العاصمة الإدارية الجديدة بكافة مدن ومحافظات الجمهورية.
وتضم المحطة مجمع نقل متكامل الخدمات ومنطقة تجارية استثمارية على مساحة 15 فدانًا، وتربط ما بين شبكة خطوط خمس وسائل نقل مختلفة على مستوي الجمهورية، متمثلة في الخط الثالث لمترو الانفاق ومسار القطار الكهربائي ومحطة للسكك الحديدية ومحطة للسوبرجيت بالإضافة إلى الأتوبيس السريع BRT والاتوبيس الترددي".
وقال السيسي بمناسبة الافتتاح، إن الدولة تسعى لتقديم خدمة مميزة للمواطنين من خلال تطوير شبكات الطرق، موضحا أن الهدف من إنشاء المحاور المختلفة بين المحافظات هو توفير حركة نقل مريحة للمواطنين.
وأضاف: "عاوزين نعمل حاحة جيدة لشعبنا وأهلنا علشان نساعدهم ونريحهم مش بس علشان يتحرك على الطريق، ولتحسين التجارة ونقل الحاصلات الزراعية في وقت قصير يحافظ عليها من التلف وغيرها".
وتطرق السيسي إلى ملف التعديات، قائلا :"أنا مش ضد إن الناس تبنى، ومش ضد البناء والتعمير، نبني ونعمر لكن بما لا يسبب مشكلات كثيرة".
وأكد الرئيس عبد الفتاح السيسي، أن حجم الإنشاءات التي تمت في جميع القطاعات تقدر بالمليارات، مضيفا: "مش سايبين حاجة في مصر مبنشتغلش فيها بكل القطاعات.. كل قطاع بنتكلم فيه تجد الرقم يقترب من تريليون جنيه"، مشيرا إلى أن الأعمال تتم بتمويل ضخم جدا والدولة حريصة على تحسين حياة الناس في كل القطاعات.
ولفت إلى أن هناك حجما كبيرا من التعديات، مضيفا: "مفيش بلد شعبها ومسؤوليها يعملوا فيها كده، ويسيبوها بالطريقة دي".
وواصل حديثه: "عاوزين نبني ونعمر، ولا بد من مواجهة التعديات لأن تكاليفها كبيرة جدًا علينا، ولن نترك محور المحمودية هكذا، وهنيجي على نفسنا ونعمل دا حتى لو كانت التكلفة كبيرة".
وقال السيسي إن حجم التعديات على حرم الطريق بالمحمودية وصل لأكثر من 5000 حالة، مضيفا :"لو كان فيه احترام ومفيش تعدي على حرم الترعة أو الرياح ومحدش قرب منه مكناش هنبقى محتاجين نعمل كوبري بتكلفة مليار جنيه كنت كل اللي هعمله ميكلفش ربع التكلفة دي".
وأردف :"لكن لما ملقتش أعمل إيه سبنا التعدي وعملنا محور تاني خالص في الميه، محدش يعمل كده في نفسه. مفيش بلد شعبها ومسئوليها يعملوا فيها كده ويسيبها بالطريقة دي".