شهدت الساعات الماضية، أزمة بين الفنان أحمد السقا وتامر حسني، بسبب فيلم "الفلوس" بدأت في برنامج "السهرة" الذي تقدمه الإعلامية وفاء الكيلاني، واستمرت عبر السوشيال ميديا، بين الاعتذارات والرد والتوضيح.
وكشف أحمد السقا، عن سبب غضبه من الفنان تامر حسني، قائلًا: "أنا زعلان من تامر حسني.. وأول مرة أقول رغم أني بحبه جدًا.. ولو مش بحبه مش هزعل منه".
وأوضح السقا، أنه عندما طلب منه "تامر" أن يظهر كضيف شرف في الفيلم وافق على الفور، فقد سبق ظهر معه كضيف شرف في مسلسل "ولد الغلابة"، لافتًا إلى أنه فوجئ باسمه في دعاية فيلم "الفلوس" وكأنه مشارك في البطولة، بل إن الاسم كان موجودا على بعض الأفيشات".
وأضاف السقا: "كلمته.. مرة قاللي دول فانز ومرة قالي دي الشركة المنتجة، قولتله أنا معرفش الشركة ومعرفش حد غيرك وميصحش.. ودي أثرت عليا نفسيا وأثرت عليا في شغلي".
وتابع: "لو تامر قابلني دلوقتي وقالي كلمتين حلوين خلاص هنتصافى.. بس زعلت لأنه ميصحش يعمل فيا كده.. هو كان بإيده يمنع الكلام ده بس واضح إنه كان مشغول.. أو ممكن يكون عداها.. وأنا مسامحك يا عم تامر".
تامر لـ السقا: زعلك يعز عليا
وخرج الفنان تامر حسني، ليرد على كلام السقا، وقال خلال خاصة "ستوري" بحسابه الرسمي بموقع تبادل الصور "إنستجرام": "حبيبي وأخويا وصديق العمر ونجم الدنيا كلها أحمد السقا، كنت أتمنى إنك تكلمني بيني وبينك".
وتابع: "لو كنت زعلان من أي حاجة أو فاهم أي حاجة غلط، لأن الحاجات دي لا يمكن تفوتك، وأنا كنت أتمنى ماكتبش الكلام ده هنا، بس عشان بعد كلامك في التليفزيون، الجمهور الكريم بقى ليه حق إنه يفهم الصح". وأضاف: "عشان أفكرك بس، أنت كلمتني وقلت لي فيه خبر في موقع، وعليه صورة افتراضية للفيلم، وكاتبين أنك بطل في الفيلم، وأنا رديت عليك إن دي اجتهادات صحفية والصورة من تصميم محبين اللي أكيد فرحوا بالخبر إننا مع بعض، حتى أنا مقولتش إن دي الشركة المنتجة، لأنها شركة كبيرة، ولا يمكن تعمل كده، لأن الفيلم متباع للخارج والداخل باسم أخوك تامر حسني، نزل والناس كلها شافته، وأنت مش فيه ولا فيه اسمك، كل الأبطال طالعين مرسومين، ومعرفش زعلك من إيه الحقيقة، كان ممكن تزعل لو الكلام ده نزل على صفحتي أو صفحة الشركة المنتجة".
واستكمل: "أنا شرحتلك ده من سنة واتكلمنا بعدها، مرة عيدت عليك في عيد ميلادك والتانية بخصوص برنامجك، ولو كنت لسه زعلان كنت هتقولي ساعتها، الفيلم بقاله سنة يا أحمد".
واختتم قائلًا: "إنت حبيبي يا أحمد وصديق عمر، عشان كدا أنا اللي مش هزعل منك، معلش طولت في الكلام، لأن برضو زعلك يعز عليا".
السقا: خالصين يا عم
استمر الرد والاعتذار، عبر مواقع التواصل الاجتماعي، ليوجه السقا، رسالة لـ تامر حسني، عبر "الفيس بوك"، وكتب: "رسالة إلى صديق عزيز.. صديقى وأخى العزيز تامر حسني.. انت عارف اللي بينى وبينك عيش وملح وحاجات كتير، قد أكون أخطأت إنى اتكلمت في الموضوع ع الهوا ولكن يعلم الله كم كنت مجروحا وكم كنت حزينا".
وتابع: "مش هطول عليك أكتر من كده ولو أنا زعلت شوية وأنت شوية نبقى خالصين يا عم.. تامر حسني احنا اللى بينا كتير متزعلش يا عم وحقك عليّ.. وميعادنا الحفلة اللي جاية.. أحمد السقا".
تامر حسني ينهي الخلاف
"حصل خير" قرر الفنان تامر حسني، انهاء الخلاف، وكتب عبر خاصية "ستوري" على "إنستجرام": "حبيبي يا صاحبي حصل خير.. أنا عمري ما أزعل منك، ولا أشك لحظة في جدعنتك مع الناس كله .. جايز كان في النص بينا ولاد حلال كتير".
واختتم: "أنت السقا حبيب قلبي وكدا الجمهور هيستنانا الحفلة الجاية بجد.. سخّن صوتك واستعد للدويتو القادم يا أغلى وأنضف الناس".
فيلم "الفلوس" من إخراج سعيد الماروق، سيناريو وحوار محمد عبد المعطي، وقصة تامر حسني، وشارك في بطولته تامر حسني وخالد الصاوي، زينة، عائشة بن أحمد، ومحمد سلام.