بالفيديو| بائعون ومواطنون: "كل حاجة غليت ومش عارفين نبيع ولا نشتري"

"كل حاجة غليت، والناس كلها بتشتكي، ومفيش زبون ييجي يشتري إلا واشتكي من ارتفاع الأسعار، الشعب خلاص تعب يا حكومة".. بهذه الكلمات لخص عدد من بائعي المواد الغذائية والخضروات معاناتهم مع أزمة ارتفاع الأسعار المتواصل.

وفي جولة قامت بها "مصر العربية" داخل منطقة الدقي، للوقوف على آراء المواطنين في الأسعار؛ انقسم ردود فعل المواطنين ما بين متجاهل للحديث (لاقتناعه بأنه لا جدوى منه)، وآخر يرى أن في الحديث تنفيس عما بداخله، وثالث فضل عدم الحديث عن أي شيء.
 

الحاجة "أم محمود"، إحدى بائعات الخبز، اشتكت من ارتفاع الأسعار وقسوة المعيشة في بداية العام الجديد، وقالت السيدة المسنة: "كل حاجة غالية والعيش رفع من 25 قرش للرغيف حتى أصبح الـ3 أرغفة بجنيه واحد، والرغيف الكبير اللي كان بـ50 قرش ببيعه بجنيه، بسبب ارتفاع سعر الدقيق".
 

و"أم خالد" 35 سنة، بائعة للخضروات والفاكهة، قالت: "نسبة البيع من فترة كانت 80%، دلوقتي أصبحت 10%، وما فيش بيع بسبب ارتفاع الأسعار، إحنا بنقول للحكومة كل حاجة بقيت غالية، والناس كلها بتشتكي، ومفيش زبون جي يشتري إلا واشتكي، وإحنا بنقول للحكومة الشعب تعب".
 

أما "عم سيد"، بائع أحذية، فطالب الشعب بالصبر على الأوضاع الاقتصادية الصعبة حاليًا: “إحنا حتى لو معانا فلوس ومش عارفين نشتري بيها حاجة في الوقت دا، لازم نحمد ربنا في الأول على نعمة الآمان على البيت والأسرة والأحفاد”.
 

وتابع: "ربنا يعين الرئيس السيسي ويقويه بس إحنا نفسنا إنه يحس بالناس شوية، لأن الناس تعبت، واحد زيي بيقدر يشتري، في ناس غيري مش قادرة، اتمني من سيادة الرئيس الاهتمام بالناس الفقيرة شوية لأن الاسعار بتزيد، وإحنا بنناشد الرئيس ياريت الجيش يهتم بالزراعة والدواجن والمواشي".

فيما قال أحد الشباب ويدعى "حسين" ويعمل بائع فاكهة "متجول": "إحنا شايفين سنة 2017 إنها سنة سودا بسبب ارتفاع الأسعار، كل حاجه غالية".
 

أما الحاجة "علية"، صاحبة أحد المطاعم فقالت إن كيلو "الفراخ" وصل لـ30 جنيها بدلا من 20 جنيها قبل شهور قليلة، كما أن سعر السكر وصل إلى 16 جنيها وسعر كيلو الأرز وصل إلى10 جنيهات.

وتابعت السيدة الخمسينية: "جميع أسعار الخضروات ارتفعت رغم أننا كنا ننتظر2017 بأسعار أقل، إحنا مش عارفين نتعامل إزاي في البيع، إحنا بيصعب علينا الزبون وبيصعب علينا نفسنا من اللي بيحصل، مفيش بيع ولا فلوس، بنتعامل مع التجار بالأجل، علشان نعرف نمشي نفسنا، كنا نتمني إن السنة الجديدة تكون أسعار ارخص ولكن الأسعار ارتفعت بشكل غريب وخصوصا بعض السلع المطلوبة مثل الزيت الزجاجة وصل سعرها لـ17 جنيه وبنشتري رغيف العيش للمحل بـ 40 قرش".

أما محمود محمد، مواطن، قال: "إحنا مش عارفين حاجة، كل يوم بنسمع سعر جديد، مش عارفين حتى نحفظ أسعار الحاجة اللي بنشترها".