كيف تتعاملين مع الزوج عندما ينحاز لأهله؟
الدخول في علاقة زوجية لا يعني التعامل مع شريك الحياة فقط، بل هناك أشخاص آخرون من الضروري الاحتكاك بهم والتعامل معهم.. إنهم أهل الزوج.
وتشتكي العروس دائما من انحياز زوجها لأهله، فقد ينصفهم على حساب مشاعرها أحيانا، وأحيانا أخرى قد يدافع عنهم من أجل أن تتعود الزوجة على وجودهم في حياتها، فالزواج ليس علاقة قائمة بين شخصين فقط، ولكنه حياة بين عائلتين.
وقالت مايسة كمال المحاضر في العلاقات الأسرية: "لو انتي لسه متجوزة وشايفة أن زوجك منحاز لأهله؛ ده شيء ما يقلقكيش أوي لأن في بداية الزواج العريس بيحاول دايما ينصف أهله بحجة أنه بيعودك أنهم هما أهله، ولازم تحترميهم ومع الوقت الانحياز الفظيع ده هيخف".
وأضافت كمال في تدوينة لها عبر فيسبوك: "بلاش تدخلي بروح المنافسة"، مؤكدة أن المرأة الذكية "تدخل وتستكشف لحد ما تبدأ تفهم العائلة اللي دخلت فيها، ومن ثم تبدأ تحدد إيه الأسلوب المناسب معاهم وليس العكس".
وتابعت: "حددي وميزي هل أم زوجك مسيطرة ولا لأ، متدخلة قوية ضعيفة ولا لأ، وبرضه خدي بالك لأن ممكن تكون اللي بتلعب دور الأم أو الحماة هي أخت زوجك، وممكن تبقى الأم فعلا طيبة ويبقى حد من إخواته هما السبب في معالمة حماتك ليكى بالشكل ده وتحيز زوجك ليهم بالطريقة دي".
ونصحت كمال الزوجة بضرورة التفكير في أهم شخصية موجودة في عائلة زوجها ومحاولة تقديرها وكسب ودها بالهدايا والاستماع إليها وبالعزومات أيضا، والابتعاد تماما عن الدخول في مشاجرات حتى لا تخسرها، مطالبة المرأة بأن تكون ذكية وواعية لأنها لا تملك رصيدا من الحب عند أهل الزوج.
ووجهت محاضر العلاقات الأسرية حديها للزوجة: "انتي ممكن تكوني شخصية حساسة بتكبري الموضيع، وبتاخدي كل حاجة على أعصابك، وبيبقى هو ولا أهله قاصدين حاجة، وانتي بتحولي المواضيع دائما بشكل عدائي، فحاولي تاخدي بالك من أفعالك وتصرفاتك، واعرفي أن الكلمة الطبية صدقة".
ولفتت كمال إلى طبيعة أهل الزوجة، قائلة: "لو هم من نوع ساعة كويسين وساعة وحشين ومهما اشتكيتى لجوزك مبيتغيروش، اعرفي ساعتها أن ملهاش لازمة تاني تلومي، لأن النوع ده من الناس مصابين بعدم استقرار نفسي، والعيب فعلا مش فيكي زي ما بنقول بالمصري مدقيش".
وطالبت كمال الزوجة بضرورة الإحسان إلى أهل الزوج، وأن تحكي لزوجها المواقف التي تفعلها من أجل أهله، موضحة: "وعرفيه أنك بتعملي فعلا كده عشان خاطره، وخليه يعيد التصرف في موقفة غير العادل".
وأشارت كمال إلى: "مفيش راجل يحب حد يتكلم عن أهله بسوء، ولو بتحبي جوزك فعلا حاولي تتقبلى أهله بالحلو اللي فيهم قبل الوحش"، مشيرة إلى "طول ما انتي بتحسسيه أنك مضايقة من أهله؛ هيفضل معاكي بيتصرف بطريقة طردية، وكل ما تشتكي منهم كل ما يتمسك بيهم ويحس أنهم ضحية معاكي".
وأضافت: "متقوليش أنا جربت كل حاجة ومفيش فايدة فيهم، أكيد في حاجة مجربتهاش، وحتى لو جربتي فعلا كل حاجة معاهم بس ناقصك حاجة واحدة بس، وهي تجديد النية لله أنك فعلا بتعملي كده معاهم لله، وعشان رضا زوجك مش بتعملى كده، وأول ما يدوكي ظهرهم تغلطي فيهم".
وشددت كمال على ضرورة الصبر، وألا يتدخل الأبناء في الموضوع حتى لا تخسري كل الاطراف، مشيرة إلى: "مع الوقت هيفهموا أن أصلك طيب، ومع الدعاء واحتساب كل حاجة حلوة بتعمليها في ميزانك عند الله، واصبري واعرفي ان الشخصيات اللى معندهاش صبر بتعاني دايما في معاملتها مع الناس، وخليكي زوجة ذكية وواعية، وبلاش تكوني زوجة ذكية خبيثة لأن اللي جواكي هيوصلهم".
