تامر أبو عرب عن فيلم العساكر: الإعلام لا يتناول مشاكل الناس الحقيقية
انتقد الإعلامي تامر أبو عرب، ردود أفعال بعض الإعلاميين على فيلم العساكر، الذي انتجته قناة الجزيرة القطرية، عن التجنيد الإجباري في مصر.
وقال "أبو عرب" في تدوينة عبر صفحته الشخصية بموقع التواصل الاجتماعي "فيس بوك": "طبعًا من حقك تغضب وتقول أننا رافضين أي قناة مش مصرية تناقش شؤوننا وأن قضايانا ومشاكلنا لازم تتناقش بيننا، بس لازم تسأل نفسك في الأول هل قضايانا ومشاكلنا بتتناقش بيننا؟ وهل إعلامنا بيتكلم عن الحاجات اللي بتهم الناس بجد وبيناقش أفكارهم ويسمع صوتهم؟ طبعًا الأسئلة دي مش محتاجة إجابة لأننا كلنا عارفينها مقدمًا".
وتابع: "عارفين إننا عملنا نموذج قميء ورديء للإعلام التعبوي اللي شغال 24 ساعة دعاية للسلطة وانحياز لقراراتها حتى لو كانت ضد الناس اللي مفروض أنه بيتكلم بلسانهم، عارفين أن كل الأصوات المختلفة - المختلفة مش المعارضة حتى - تم سحقها وإبعادها عن الشاشة واستبدالها بأصوات ثانية ولاءاتها مضمونة وبتعلّي على السلطة كمان".
وأضاف: "عارفين أن فيه ضيوف دخولهم القنوات المصرية ممنوع وأن ضيوف برامج التوك شو بقوا بيمثلوا تيارات مختلفة زي (مؤيد - مؤيد جدًا - مؤيد خالص - مؤيد على استحياء)، عارفين أن عمرو الليثي برنامجه وقف وأتمنع من السفر علشان تقرير واحد من الشارع اتكلم فيه مواطن عن همومه، وأن التقرير ده اتمسح من على كل صفحات القناة اللي ذاعته".
وواصل: "أي فراغ هتسيبه غيرك هيملاه، قواعد السياسة والإعلام والجغرافيا والتاريخ وحتى الفيزيا بتقول كدة، فقبل ما تتحمق وتزعل من اللي بيتكلموا عليك برة اسأل نفسك سؤال بسيط جدا: هل الكلام مسموح جوة؟".
