سامح أبو عرايس: ظلمنا الإخوان.. إحنا آسفين يا مرسي

رأى سامح أبو عرايس مؤسس حركة "أبناء مبارك"، أن عهد الرئيس عبد الفتاح السيسي، شهد العديد من الأزمات السياسية مقارنةً بعهد الرئيس المعزول محمد مرسي، على حد قوله.
 

وقال "أبو عرايس" في تدوينة عبر صفحته الشخصية على موقع التواصل الاجتماعي "فيس بوك": "كلمتين عايز أقولهم في بداية السنة الجديدة علشان أريح ضميري.. بعد اقرار الحكومة للتنازل عن تيران وصنافير واحالتها للبرلمان للتصديق عليها كده يبقى كل اللي اتهمنا به مرسي وكنا خايفين انه يعمله بيعمله حاليا السيسي .. كنا خايفين ان مرسي يتنازل عن جزء من سيناء والنهاردة السيسي بيتنازل عن تيران وصنافير".
 

وتابع: "كنا خايفين ان مرسي يغرق مصر بالديون وينفذ أجندة صندوق النقد الدولي بخفض العملة والغاء الدعم والنهاردة السيسي نفذ كل ده وأغرق مصر بالقروض الخارجية ووصل الدولار لعشرين جنيه وبيلغي الدعم وعايز يبيع المستشفيات الحكومية كمان وكل أجندة صندوق النقد الدولي بينفذها بالحرف".
 

وأضاف: "كنا بنقول ان مرسي والاخوان هيقمعوا أي شخص يعارضهم ويعملوا فاشية باسم الدين ويبقى اللي بيعارضهم ضد الدين والنهاردة السيسي ومؤيدينه حولوا البلد الى فاشية باسم الوطنية واللي يعارض السيسي يبقى ضد الجيش ويبقى خائن ويتشتم من الاعلام واللجان الاليكترونية وممكن يختفي قسريا أو يعتقل أو يتصفى في الشارع".
 

وواصل: "الحقيقة ان النظام الحالي بيعمل أبشع بكثير من اللي كنا خايفين ان الاخوان يعملوه .. علما بأن أغلب اللي هاجمنا مرسي علشانه كانت مخاوف وتوقعات يعني ماشفناش مرسي بيتنازل عن أرض فعليا مثلا وماشفناش ذبح للمعارضين في الشوارع زي اللي حصل في رابعة والنهضة وغيرها وماشفناش اختفاء قسري".
 

واختتم: "علشان كده حاسس فعلا اننا ظلمنا مرسي والاخوان .. إحنا آسفين يا مرسي!".