تامر أبو عرب: النظام لم يمتلك الأدلة الكافية لإثبات تهمة الإرهاب على أبو تريكة

رأى الإعلامي تامر أبو عرب أن النظام لم يمتلك الأدلة الكافية لإثبات تهمة الإرهاب على لاعب الأهلي والمنتخب الأسبق، محمد أبو تريكة.

وكتب "أبو عرب" عبر حسابه الشخصي على "فيس بوك": "الأسوأ من اللي أضاف اسم أبو تريكة لقائمة الإرهاب، المبرراتية والمخلصاتية المكلفين والمتطوعين، والأسوأ من القرار التبريرات اللي بيقدمها اصحابنا دول".

وتابع مستنكرًا: "قالك هو أبو تريكة أحسن من مارادونا وللا فضل شاكر؟ بيقارنوا أبو تريكة اللي كل تهمته إنه شريك في شركة سياحة واحد من ملاكها إخوان بلاعب مثبت عليه تهمة تعاطي المخدارات ومعترف بيها، ومطرب عمل فيديوهات ماسك فيها السلاح وبيقول إنه قتل اتنين من جنود الجيش اللبناني، والأفظع من كدة كمان إن فضل شخصيا محدش خد ضده إجراء زي اللي اتاخد مع تريكة، يعني هو مطلوب للمثول قدام العدالة لمواجهته بالاتهامات المنسوبة إليه ولم يصدر أي قرار من لبنان بضمه لقوائم الإرهاب رغم إن كل الفيديوهات بتقول إنه أتى أفعالا إرهابية".

مضيفًا "قالك أصل أبو تريكة دعم اعتصام رابعة وزار الاعتصام.. إيه بقى الأدلة اللي بيستندوا بيها علشان يثبتوا التهمة دي؟ (دي لو ترقي لتسميتها بتهمة أصلا) بيستندوا لفيديو بيعلن فيه حد على منصة رابعة إن أبو تريكة سينضم للاعتصام، تخيل يا مؤمن؟ لقيوا فيديو للإعلان عن قدومه وملقيوش فيديو ليه هو شخصيا لما زار الاعتصام مع إن ده لو حصل كنت هتلاقي فيديوهات ليه وهو في الاعتصام أكتر من الدقايق اللي لعبها في تاريخه كله وكان هيبقى حدث جلل الناس تتكلم عنه لشهور، وبيستندوا كمات لخبر منشور في صدى البلد وقت اعتصام رابعة بيقول إن أبو تريكة ههيزود الاعتصام بمولدات كهربائية، وبرضه من غير أي إعلان من ابو تريكة عن كدة".

واستطرد "أبو عرب": "قالك أصل أبو تريكة له فيديو بيدعم فيه مرسي للرئاسة وبيقول إن مصر محتاجة لكيان منظم وليه تواجد في كل قرى مصر.. تخيل حضرتك إن أساتذة علوم سياسية وناس معاهم ماجستير ودكتوراه بيقولوا نفس الكلام ده وقتها؟ تخيل إن كتير من الناس المقتنعة دلوقتي إن أبو تريكة إرهابي للسبب ده هم نفسهم كانوا بيقولوا ساعتها إن الإخوان ناس محترمين وبتوع ربنا وكانوا بيتخانقوا معايا لو حاولت أقنع الناس بانتخاب حد غيرهم؟ طيب تخيل كمان إن ناس بقوا وزرا بعد ٣٠ يونيو كانوا داخلين البرلمان على قوائم الحرية والعدالة؟ وتخيل إن فيه أكتر من ١٣ مليون مصري انتخبوا مرسي للرئاسة المفروض بقى نضمهم كلهم لقوائم الإرهاب؟ بلاش كل ده.. تخيل إن مرسي ما فاز تريكة سكت ومحاولش يستفيد بموقفه بأي شكل أو يتملق السلطة الجديدة في الوقت اللي محمد أبو العينين صاحب مجموعة كليوباترا اللي بيقبض منها أحمد موسى مرتبه كل شهر بيعمل إعلانات في الجرايد يهني فيها القائد والزعيم بالفوز؟".

واختتم حديثه: "طبعا مفيش حد فوق القانون (غير مرتضى منصور وعشرين تلاتين واحد كمان كدة) ولو أبو تريكة فعلا حرض على العنف أو مارسه او ليه فيديوهات بتشجع على قتل جنودنا وللا حتى بتشمت فيهم كنا ساعتها ممكن نفهم الحملة اللي عليه ووصفه ب(الإرهابي) هو وناس كتير زيه على فكرة في القايمة ميتخيروش عنه في الوطنية والأخلاق".

وجاء اسم أبو تريكة ضمن قائمة الأسماء المتحفظ على أموالهم من قبل لجنة حصر وإدارة  أموال جماعة الإخوان، والتي تم إدراجها في القرار الصادر الأسبوع الماضي على قائمة الإرهابيين لمدة 3 سنوات، وذلك على ذمة القضية رقم 653 لسنة 2014 حصر أمن دولة عليا، التي يتم التحقيق فيها بناء على بلاغ مقدم من لجنة أموال الإخوان.

وبالإضافة إلى أبوتريكة تضمن القرار الصادر عن الدائرة السادسة  أسماء عدد من الشخصيات العامة منها: رجل الأعمال صفوان ثابت، ومساعدة رئيس الجمهورية السابق باكينام الشرقاوي، والإعلامي مصطفى صقر، والقاضي السابق وليد شرابي.