سيدة تروي تجربتها داخل مستشفى "الزهراء" الحكومي: "ذل وإهانة وقلة نظافة"

وثقت سيدة تدعى مي العمروسي، عبر حسابها الشخصي على موقع "فيس بوك"، تجربتها داخل مستشفى الزهراء الجامعي بالعباسية بالصور، خلال شهر ونصف قضته مع والدتها، مؤكدة أن المرضى يتعرضون لـ"ذل وإهانة" داخل المستشفى، بالإضافة لمعاملة "غير آدمية" و"قلة نظافة".

اعلان

وإلى نص ما كتبته مي..

ساعدوني في نشر الكلام ده بعد إذنكم، كل حرف من اللي هتقروه دلوقتي أنا شوفته بعنيا، خلينا ندخل في الموضوع ع طول.

دي بعض صور من مستشفى الزهراء الجامعي بالعباسية. مبدأيا غرف حجز المرضى عبارة عن غرفة فيها 10 سراير لمرضى بمرافقينهم اللي بيناموا على الأرض يعني غرفه فيها مش أقل من 17 فرد مافيهاش، سلة مهملات وفي مرضى مبيتحركوش من سرايرهم ومعهمش مرافقين بيرموا المخلفات على الأرض والغرفة متتكنسش ولا تتنضف لأكتر من 5 أيام بالإضافة للصراصير والحشرات الفريدة من نوعها.

بيتم معاملة المرضى بمنتهى التعالي والإهانة من طاقم التمريض والمشرفين وبيتم تهديد المرضى بالطرد من المستشفى، بيهددوا المريض الغلبان اللي معهوش فلوس يتعالج بإنه لو مركعش واتعامل معاهم كأسياد هيطردوه ويحرموه من الفضل اللي بيقدموهوله وكأنه مش حقنا إننا نتعالج لأن دي فلوسنا اللي بندفعها في ضرايب وغلاء أسعار وغيرة.

سراير و بطاطين المستشفى من أكتر الاشياء المقذذة الناقلة للأمراض، مبتتغيرش، وبيجبروا المرضى إنهم يستخدموها وبياخدوا من المرضى هدومهم الشخصية والفرش الخاص بيهم اللي جايبينه من بيوتهم وبياخدوا أكلهم يرموه في الزبالة.

المرضى بياخدوا علاج غلط، مش علاجهم، في مريضة ادوها دوا الضغط مرتين وده كفيل جدا بإنه يجبلها هبوط في الدورة الدموية ويموتها في وقت قصير.

جهاز قياس السكر بايظ في فرق بينه وبين ـي جهاز قياس سكر سليم زيادة حوالي 100 درجة تم اكتشاف ده متأخر وعلى الأساس ده كانوا بيدوا المرضى جرعات أنسولين زيادة وده كان طول الوقت بيتسبب في هبوط حاد في نسبه السكر واحيانا بيؤدي للدخول في غيبوبة.

هناك بيستدعوا مرضى من بيوتهم يحجزوهم في المستشفى لفحصهم مقابل 200 ج للمريض، الناس كانت بتتذل وتتهان ويناموا 2 مرضى على سرير واحد علشان 200 ج وخلال الفترة اللي بيقعدوها في المستشفى اثناء فترة الفحص في أكتر من مريض جاله فشل كلوي وعدوى بفيرس سي وتبول لا ارادي وغيره كتير و ده بسبب الاهمال والتلوث والحمامات اللي مبتتنضفش والمريض بفيرس سي عايش مع المريض العادي في غرفه واحده وبيستخدموا حمام واحد.

طقم التمريض هناك من اسوأ صور اللاانسانية اللي ممكن تشوفها في حياتك، بيسيبوا المرضى يجيلهم اختناق ومافيش جهاز اكسجين وممكن الممرضه او الدكتوره النباطشيه تبقى نايمه عادي وتكسل تقوم تلحق مريض بيموت وبيتهموا المرضى بإنهم بيمثلوا وبيقرفوهم وكأنه ده مش شغلهم .

كان في مريضة بتحتضر مش عارفه تاخد نفسها الساعه 12 بالليل ولما خرجنا جري ندور على دكتوره أو ممرضة ملقيناش ولما قعدنا نخبط على كل الغرف خرجت دكتورة كانت نايمه ومستاءة جدا وكأننا خرجناها من أوضة نومها ولما قولنالها ان في واحده بتموت ومش قادره تتنفس اتهمتها بالتمثيل وقالتلنا

" مبتموتش ولا حاجه هي كل يوم تعملنا كده".

بيتم إهانة المرضى وإبتزازهم من قبل عمال النظافة، عايز بطانية 5 جنيه، عايز مخده 5 جنيه، عايز تنضف الاوضه 5 جنيه، والا العامل يدخل يزعق ويشخط ويقول كلام زي " انتوا قرفتونا" , " احنا بنشيلكوا خراكوا " وغيره كتير .

* قسم الجراحة العامة في المبنى القديم، مشرفة الدور واسمها " إلهام مِشرح " مانعه مرافقين يباتوا مع زويهم حتى يوم العملية ولو حتى لقت حد بتطرده وتهزءه وتهدد المريض بالطرد، لما كنت قاعده مع امي يوم عمليتها وكانت متسابه وهي بتنزف وكانت تعبانه ومتقدرش تتحرك لوحدها جت المشرفة دي وصممت انها تنزلني ولما رفضت هددتني بإنها هتعملي محضر وتحبسني. أقرب حاجه في كل حاجه تهديد المريض بالطرد وحرمانه من العلاج.

نفس القسم فيه عامِله واحده المفروض انها مختصة بالتنظيف. العاملك دي هي اللي بتنضف وهي اللي بتقوم بدور التمريض وبتدي المرضى العلاج وبرضو كله بال ( 5 جنيه ).

اللي شوفته قصاد عيني لحد دلوقتي 2 مرضى دخلوا المستشفى الأولى بتتعالج من السكر وجالها فشل كلوي في المستشفى، والثانيه كان عندها حصوة على الكلى وجت المستشفى عشان يفحصوها ويدوها 200 جنيه واثناء وجودها تعبت وجالها فيرس سي وتبول لا إرادي .

_ده معظم اللي شوفته في شهر ونص قعدتهم هناك مع أمي وباقي اللي شوفته موجود على كل صورة التعليق بتاعها، والحكاية غير الحقيقة وغير ماتشوف بعنيك واهون بكتير اوي، واعتقد ان وماخفي عني كان اعظم فعلا وان اللي مشفتوش بعنيا اصعب بكتير اوي، كل اللي عاوزه اقولهلكم ان الوضع هناك لا انساني اكتر مما عقلكم هيصورلكم.

وانا مش عايزه اكتر من ان الكلام ده يتشاف والناس تعرف ان في ناس تانيه بتموت من الاهمال والتلوث ومن جرعة أنسولين زيادة ومن الذل.

مي: الورقة دي زي متابعة للمريض بيتكتب فيها الوقت ونتيجة تحليل السكر وقياس الضغط، الورقة دي اتكتب فيها يوم الاتنين بالليل التوقيتات من 9 بالليل لحد التلات الساعه 8 صباحا ارقام قياسات للسكر والضغط وهمية والمريض مكانش بيتقاسله لا سكر ولا ضغط.