ناشط يقترح إقامة حفل للفريق الإنجليزي "كولد بلاي" لتنشيط السياحة

اقترح ناشط يدعى محمد حسن علام أن يقيم حفلًا لفريق الغناء الإنجليزي "كولد بلاي" في مصر، بهدف تنشيط السياحة.

واستشهد "علام" بحفل الفريق ذاته الذي أُقيم بأبو ظبي في الإمارات، موضحًا أن حفل بحجم كبير يمكن إقامته في منطقة الأهرامات.

وإلى نص ما كتبه "علام" عبر حسابه الشخصي على "فيس بوك"..

حفلة كولدبلاي في ابوظبي استقبلت ٢٥،٠٠٠ المساحة الخاصة بـDu Arena في ابوظبي حوالي ٨٠٠٠ متر مربع. يعني تقريبا ٣ أشخاص في المتر المربع.

ممكن نوصل لمساحة مش بعيدة عن دا في الهرم، لو حوالي ٦٠٠٠، و بكثافة ٤، ممكن المساحة تكفي نفس العدد، علما بان حد السلامة هو ٤،٧. و لو في الإمكان توسيع المنطقة يكون أفضل، و الوصول ل٣٠،٠٠٠ ممكن.

لو تم إقامة ٣ حفلات في مصر (تم إقامة ٢ في برشلونة، و ٤ في لندن في ٢٠١٦ و مخطط ٣ في باريس في ٢٠١٧) ممكن نوصل ل٩٠،٠٠٠ حاضر. و لو التذكرة تمنها في حدود ٣٥٠٠-٢٥٠٠ يعني ١٢٥ - ١٧٥ دولار هتكون أرخص من الإمارات و العائد بتاعها مشابه لبارشلونة ٢٠١٦ و اكتر شوية. بالنسبة للمصريين دا أرخص من طيران و إقامة و توفير عملة صعبة و بالنسبة للاجانب دا سعر مش بطال..بس مش العائد هو بالتحديد المهم دلوقتي..نركز على استفادة السياحة..

لو افترضنا ان نص العدد اللي هييجي سياح، يعني ٤٥-٥٠ الف، و قرروا يقعدوا في مصر أسبوع واحد، لو كل واحد صرف ٥٠٠ دولار (بمعدل ٥٠ دولار يوميا، شاملة الإقامة و التنقلات و اللي هو اقل بكتير من أوروبا) مصر هيكون دخلها في أسبوع ٢٥ مليون دولار، او ٥٠٠ مليون جنيه مصري، ولا راحوا لجهات ولا للحكومة ولا رجال اعمال ولا اي لأي حد دول دخلوا في جيوب الناس مباشرة. دي مجرد تقديرات ممكن سياح يقعدوا ٣ ايام بس و ممكن اللي يقعد يقعد أسبوعين و يلف على وادي النيل و سيناء. و دا تأثير الندي القريب، اللي هيرجع هيسمع برة و بالتالي هيبدا يحصل تنشيط في حركة السياحة، و دا تأثير المدى البعيد. الى جانب دا ممكن شركات تنظم packages كاملة لأسبوع او اتنين و يتم تخصيص أسعار و عروض من مصر للطيران بالذات عشان يساهم دا في دعم خطوط طيران مصرية.

الموضوع شبه مشروع نقطة فرح اللمبي بس هيعمل فرق كبير جدا

نتمنى الكلام دا يوصل للجهات المسؤولة و انا بحاول بقدر الإمكان ارتب proposals مع كل المتحمسين زيي عشان نوصل صوتنا و مدي أهمية الحفلة دي مش بس للمنظمين بس كمان للكل..و نتمنى كل اللي حاول يتواصل مع الفريق انه يعمل تنسيق معانا عشان المجهود اللي اتبذل في الحملة (Starfish Campaign) كان ضخم جدا، و استمر لمدة سنة كاملة بالظبط، و احنا الحمدلله قدرنا نحمس آلاف من الناس اللي اقتنعوا انهم ممكن يحضروا و دا كان المحرك الرئيسي للفكرة كلها من البداية..فبنطلب من كل الجهات و الأشخاص اللي بيحاولوا يساعدوا في ان كولدبلاي ييجوا مصر انهم يتواصلوا معانا و كلنا نشتغل مع بعض على الهدف ده.

وأطلق "علام" ومجموعة من الشباب حملة Starfish Campaign، لمطالبة المسؤولين بالسماح لفريق "كولد بلاي" بالحضور إلى القاهرة.

و"كولد بلاي" هو فريق إنجليزي يضم أربعة أعضاء وهم كريس مارتن المغنى، وجوني باكلاند وجاي بيريمان عازفي الجيتار، وويل تشامبيون عازف الطبل، ويشتهرون بين العديد من الشباب المصري.