شاهد.. مواطنة تتهم مجدي عبدالغني بتحطيم زجاج سيارتها

اتهمت مواطنة لاعب الأهلي والمنتخب المصري السابق، مجدي عبدالغني، بتحطيم زجاج سيارتها، ونعتته بـ "البلطجي".

وكتبت مواطنة تدعى سالي هاني كامل القصة كاملة عبر حسابها الشخصي على "فيس بوك"، وقالت: "يوم الأحد 12-2-2017، النهاردة أول يوم في الترم التاني لابني في مدرسة "مانور هاوس" الدقي مبني kg في شارع مصدق. كالعادة احنا كأولياء أمور بنساعد بعض عشان الركنة هناك صعبة بنركن العربيات ورا بعض وبنستنا بعض نجيب أولادنا من المدرسة، وفعلا وصلت عند المدرسة الساعة 2.15 وبطلت العربية ورا عربية راكنة ونزلت وقفت جنب العربية عشان أول ما يفتح الباب أخد ابني بسرعة، وفجاة نزل واحد جتة من عربيته في آخر الشارع وقعد يرزع على عربيتي بكل قوة ويشتم مين صاحب العربية دي، قلتله أنا صاحبة العربية قعد يقل أدبه قلته أنا هجيب ابني من جوه في ثواني دخلت أجيب ابني وفوجئت إن الناس بتقول شوفت البني آدم الهمجي كسرلها إزاز العربية، فسألتها عربية مين؟ قالتي عربية أم من الأمهات بره قلتها دي عربيتي أخدت ابني بسرعة طلعت لقيت إزاز العربية القدماني مكسور مكنتش مصدقة والناس كلها عماله تقولي متسكوتلهوش".

تتابع سالي: "ركبت ابني العربية وهو عمال يعيط من الزعر وقعدت أدور عليه لقيته خامس عربية ورايا، فتح باب العربية قلتله انت كده ارتحت لما كسرت إزاز العربية ما انت لسه واقف مكانك قالي اه كده ارتحت عشان تتعلمي متركنيش تاني قدام المدرسة، طلعت الموبيل وأنا مش مصدقة كم البلطجة اللي بيتكلم بيها عشان اكتب رقم العربية، إذ أتفاجئ إنه يقولي لا لا طلعي الكاميرا أحسن انتي لسه هتكتبي لحسن تكتبي رقم غلط، ولقيته بيقولي وصوريني أنا كمان وهو عمال يضحك وقالي ابقي وريني بقا هتعملي إيه أنا أصلا هقفلكم المدرسة ديه".

وأكملت سالي: "طلع يجري ورايا واحد من السواقين قالي اوعي تسكتيله وأنا أشهد معاكي ده بني آدم قليل الأدب وأجيب كل السواقين يشهدوا على مجدي عبد الغني وطلع حضرته شايف نفسه عشان هو مجدي عبدالغني ومن حقه كلعيب كرة أنه يقل أدبه على الناس ويكسر عربياتهم وساعتها بس عرفت إن البلد دي هتفضل زبالة".

مختتمة: "أنا كلمت جوزي جالي وعملنا محضر في قسم الدقي بس ياترى في البلد دي مين يكسب المحضر ولا مجدي عبدالغني؟".