مالك عدلي: فيديو "صاعقات القلوب" مرعب وعلينا البحث عن مخرج حقيقي

ندد المحامي والحقوقي مالك عدلي، بالفيديو الذي نشره تنظيم الدولة الإسلامية "داعش"، وبث فيه مشهد استهداف رجال الجيش في سيناء.

وقال في تدوينة عبر حسابه على موقع التواصل الاجتماعي "فيس بوك": "بغض النظر عن موقفك من النظام (أنا شخصيًا ضده تمامًا) بس كمان مفيش داعي تقعد تفتي وتنظر في تفجيرات لكنائس مصرية بروح وعقل الكابتن مدحت شلبي".

وتابع: "لا انت خبير في الأمن ولا في الإرهاب ولا انت تخصص مكافحة جرايم ولا انت شفت حاجة من أساسه، لا انت ولا الأشكال الضالة اللي بتطرش علينا في التليفزيون وهوبا كان انتحاري لاء دي عبوة ناسفة لاء طب شوف الفيديو داه، أوبا طب شفت دي.. إيه الجنان داه؟؟، مهواش ماتش كورة علشان كل واحد يشجع فريق".

وأضاف: "البلد دي فيها إرهاب حقيقي والإرهاب دا بيستهدف المسيحيين وبيستهدف جنود الجيش المصري في سينا (الفيديو اللي ناشراه داعش عن قنص جنودنا في سينا مرعب بجد)، نختلف زي م احنا عايزين ونقول في النظام السياسي وطريقة إدارة الدولة ما قال مالك في الخمر، بس إدعاءات المخابرات هيا اللي عاملاها والفتي دا كله بجد عيب وقلة أدب وقلة ضمير واستحمار، احنا في مصيبة سودا ولازم نفكر هنخرج منها إزاي، حتى لو اللي مسؤولين عن البلد دي معندهمش مخرج ولا حل احنا في النهاية اللي هنشيل الطين ولازم ندور على حل، وأداءات جماهير السيرك والهري الفاضي دا مش نافعين وياريت نركز شوية".

وبث تنظيم "داعش" الإرهابي، مقطع فيديو أطلق عليه "صاعقات القلوب"، يكشف استهداف جنود الجيش المصري في سيناء.