مي كساب: «أزمة أوكا وأورتيجا قاتلاني»
أعربت الفنانة مي كساب عن حزنها الشديد بسبب الأزمة التي لاحقت كلا من زوجها «أوكا» وصديقه «أورتيجا»، مطربي المهرجانات، بعد اتهامهما بتزوير شهادة الخدمة العسكرية.
وكتبت «كساب» عبر حسابها الشخصي على موقع «إنستجرام»: «نفسي تعبانة قوي بقالها ٦سنين مصدومة ومحتارة ومش عارفه ترسى على بر مش عارفة تلاقي راحه البال ولا السعادة ولا الرضا بتدفع تمن إنها حساسة زيادة عن اللزوم بتدفع تمن التربية والأصول من يوم ما الثورة قامت وأنا مش أنا كبرت وعجزت وصغرت وعيلت وشيبت مش فاهمة حاجة تايهة توهه وحشة قوي مش عارفة ألاقيني خالص والله العظيم مش لاقية مي خالص أنا مش أنا».
وأوضحت «كساب»: «ابتلاءات كتير والحمد لله صدمات في البشر أكتر والحمد لله حتى الشغل حاسة فيه بكبوة كبيرة جدا استنزاف واستهلاك مش طبيعي وبرضه مش باستسلم بقوي نفسي وأقولها قومي ما تفقديش الأمل في رحمة ربنا ما تفقديش الأمل في بكرة أحلى ما تفقديش الأمل في المدينة الفاضلة ما تفقديش الأمل في إنك تلاقي مي من جديد بس للأسف النفاق والوشوش الكذابة اللي شفتها وقت الثورة صدمتني قوي موت أمي كسرني قوي تدخل الناس في حياتي وتعليقاتهم الغير مهذبة واجعني قوي استنزافي في الشغل واستهلاكي وإحساسي أني مش عارفه أقدم الفن اللي نفسي أقدمه دابحني قوي أزمة جوزي قاتلاني قوي كل حاجة حواليا قوي قوي قوي عارفة إن ده أصعب اختبار من رب العالمين ونفسي أكون قده باحاول أكون قده بس تراكمات السنين مبهدلاني قوي حاسة إن نفسي محتاجة إعادة هيكلة زي كل حاجة في بلدنا».
وتابعت مي: «يارب خرجنا من المحنة الكبيرة دي محمد كان بيديني طاقه أمل كان بيصبرني ودايما يقولي اللي جاي أحلى هتتولدي من جديد ربنا يرجعك انت وأحمد بالسلامة عشان بجد نفسي أتولد من جديد وأفقد الذاكرة وأنسى وجع وتعب السنين دول بس ما أنساش اللي اتعلمته منهم أنا في انتظار رحمة وعدل ربنا في انتظار نفسي في انتظار موعدي مع السعادة أوكا وأورتيجا مظلومين».
جدير بالذكر أنه تم القبض على أوكا وأورتيجا، داخل مطار القاهرة الدولي، الشهر الماضي، وذلك عقب وضع اسميهما على قوائم الممنوعين من السفر، واتهامهما بتزوير أوراق رسمية.
