تامر أبو عرب: «الجمعيات الأهلية» به مشاكل ضخمة.. و«مش عاجب» الحكومة

علّق الكاتب ومقدم البرامج، تامر أبو عرب، على تصديق الرئيس عبدالفتاح السيسي على إصدار قانون تنظيم عمل الجمعيات وغيرها من المؤسسات العاملة في مجال العمل الأهلي، وذلك بعد إقراره من مجلس النواب.

وكتب «أبو عرب» عبر حسابه الشخصي على موقع «فيس بوك»: «السيسي أقر خلاص قانون الجمعيات الأهلية زي ما جاله من البرلمان.. خلونا نفتكر إن القانون ده قدمه عبد الهادي القصبي شيخ الطرق الصوفية، وإن فيه مشاكل ضخمة جدا هتخلي العمل الأهلي التطوعي في مصر مخاطرة كبيرة جدا، سيبك بقي خالص من قصة المنظمات الحقوقية اللي هي بالعشرات، احنا بنتكلم عن آلاف الجمعيات الأهلية في القرى والمدن والمحافظات البعيدة هي البديل للدولة تقريبا وبتوفر مساعدات كتير للأسر المحتاجة اللي مش طايلاهم برامج الدعم الحكومية، أو طايلاهم ومش كافية، مش بس كدة ده أحيانا بتقوم بتوصيل المياه للناس في قرى الحكومة مش بتسمع عنها أصلا».

وأوضح تامر: «القانون الجديد هيخليك ممكن ببساطة شديدة ولأتفه الأسباب تتحبس علشان بس حاولت تساعد الناس متطوعا وتضيع وقتك وفلوسك وصحتك علشان تعمل حاجة هي أصلا المفروض من واجب الدولة والحكومة».

وتابع: «خلونا نفتكر كمان إن مجدي العجاتي وزير شئون مجلس النواب قام في وسط القاعة قبل التصويت على قانون الجمعيات وقال لرئيس البرلمان: "ياريس الحكومة عندها ملاحظات ومش واخدة فرصة تعرضها، فلو مش عاوزين تسمعوا ملاحظاتنا احنا ممكن نمشي" يعني الحكومة نفسها مش عاجبها القانون وشايفة إن القيود والعقوبات اللي فيه مبالغ فيها، متخيلين إن حال الجمعيات بقى يصعب ع الحكومة؟ طيب متخيلين إن علي عبد العال مداش فرصة للحكومة تعرض الملاحظات دي وإنه عمل للوزير إقصاء لدرجة إنه خرج عن شعوره وقال لو مش هتسمعونا نمشي؟».

وأضاف «أبو عرب»: «بعد كل ده ناس كانت بتراهن على السيسي انه يستخدم حقه الدستوري ويعيد القانون مرة تانية للبرلمان علشان يتعالج الخلل ده لمصلحة الدولة قبل مصلحة الناس وعلشان متخليش الناس تنصرف عنها في وقت احنا محتاجين فيه لأي مبادرة غير حكومية تعالج الفراغ المرعب اللي سايباه الدولة، لكن كالعادة السيسي معملش ده والنهاردة صدّق بشكل نهائي على المشروع من غير أي تعديل علشان هو عاوزه كدة ومبسوط بيه كدة».

واختتم «أبو عرب» حديثه قائلًا: «بس قبل ما نقفل يا جماعة ياريت مننساش نقول إن السيسي حلو واللي حواليه هم اللي وحشين ونكررها كتير على قد ما نقدر».