مطربة فلسطينية مصابة بالسرطان تتهم صناع «حلاوة الدنيا» بـ«السطحية»

وجهت المطربة الفلسطينية، ريم بنا، والمصابة بمرض السرطان، رسالةً إلى صناع مسلسل «حلاوة الدنيا» للفنانة التونسية هند صبري، والذي يسلط الضوء على حياة مرضى السرطان.

وكتبت «بنا» عبر صفحتها الرسمية على موقع «فيس بوك»: «بالبداية حبيت أحضر مسلسل "حلاوة الدنيا" لأنه بيحكي عن مرض السرطان.. واللي أنا مصابة فيه.. وكنت أتمنى يطلع غير عن أي مسلسل تناول هالحالة.. بس للآسف.. بعد مشاهدة 6 حلقات خابت توقعاتي.. أكيد راح أحضرو على أمل تتغير الأحداث لصالح العمل ويعطونا قوة وانتصارات مقنعة غير مفتعلة، وكمان رح أتابعو عشان في ممثل بحبو كثير، بيستحق أدوار بطولة لأنه هو الله خلقه فيه صفات النجم.. "هاني عادل"».

وتابعت «بنا»: «سؤال للمخرجين ولكتّاب القصص الدرامية.. شو المحبب إنه تْصَدرولنا عمل درامي محشو بالشك والخوف وترهيب نفوس الناس من السرطان؟؟ يا عمي رعب الناس من الموضوع عم يوتْرنا.. إحنا مش خايفين ولا قلقانين.. إنتو ليش متوترين عنا؟».

وأضافت «ربنا»: «بعدين ليش بمعظم الحلقات بتقولوا "cancer" بالإنجليزي؟ إنه من منطق تخفيف وقْع الكلمة عالمشاهد؟ اسمه سرطان.. سرطان.. ضروري نقولها».

وأوضحت الفنانة الفلسطينية: «السرطان مش مرض بيعني "انتهت حياتنا".. ولا بالضرورة مرض قاتل أو مستعصي.. السرطان بحب الخوف والضعفاء.. ليش لتعطونا إلو لقمة سايغة.. بطرح إحساس الخوف بالمسلسل.. السرطان كيف هو حكالي.. إنه خلل ببرمجة الخلايا في جسمنا.. يعني خلايانا إحنا.. بجسما إحنا.. مش مفروض نتعامل معو كإننا بحلبة مصارعة.. وأصلاً أنا ضد ينقال "بعد صراع مع مرض عضال" نحنا ما منصارع.. إحنا منحاول نرجّع الخلايا الحائرة للمسار السليم».

وتابعت ريم: «ومش بالضرورة "مرض عضال" لأنو صار في ما لا نهاية من العلاجات.. وفي كثير بيناتنا ناس عايشة ويمكن ما حدا بيعرف إنهن مصابين..
إعرفوا إنو حياة الكثيرين بلشت بعد ما مرضو.. حياتهن صار إلها معنى.. تمرّدوا عكل اشي كان مسببلهن التعاسة.. تحوّلوا لأشخاص أقوياء وخلّاقين رغم الوجع اللي بسببو العلاج.. إحنا ناس أصحاء أكثر من أي حدا.. في منا بخاف.. بس لازم نحاول نشد اللي بخاف لفوق.. للحياة.. للأمل.. للفرح .. لحتى يكمل بالرحلة..
ورجاء اهتمولنا بدور الممثل/ـة اللي عم يشتغلو دور المصاب/ـة.. لأنو الأداء مصاب بالسطحية.. والسطحية داء محبط أكثر من السرطان.. عذراً.. هو مجرد رأي.. وشكراً».

مسلسل «حلاوة الدنيا» من بطولة هند صبري، ظافر العابدين، أنوشكا، رجاء الجداوي، حنان مطاوع، هاني عادل، ومن تأليف سما أحمد وإنجي القاسم، تحت إشراف السيناريست تامر حبيب، وإخراج حسين المنباوي.