تامر أبو عرب: شعبية السيسي معرضة للانهيار إذا تم تمرير «تيران وصنافير»

رأى الكاتب ومقدم البرامج، تامر أبو عرب، أن شعبية الرئيس عبدالفتاح السيسي ستتأثر إذا مرر البرلمان اتفاقية ترسيم الحدود البحرية بين مصر والسعودية.

وكتب «أبو عرب» عبر حسابه الشخصي على موقع «فيس بوك»: «جزء كبير من شعبية مرسي خسره من الأنباء - مجرد الأنباء - عن اعتزامه منح حلايب وشلاتين للسودان ومنح جزء من سيناء للفلسطينيين. سمعت ده بقوة في الشارع وفي دوائر الأقارب والمعارف والجيران اللي أنا عارف إنهم ادوا صوتهم لمرسي ولمرشحي الحرية والعدالة في الانتخابات اللي تلت يناير، ومن وقتها فضل الناس يتعاملوا بتوجس مع أي قرار لمرسي وأي لقاء ليه مع قادة حماس أو مسؤولي السودان».

وتابع «أبو عرب»: «أول "بونط" شعبي خده عبدالفتاح السيسي واتعرف بيه في الشارع كان قراره بحظر تمليك الأراضي على الشريط الحدودي لغير المصريين. قبلها كان تعريفه في الشارع "الجدع الإخواني اللي جايه مرسي وزير دفاع" وبعدها بدأت ثقة كبيرة تنشأ بينه وبين الناس لأن القرار بدا وكأنه تحدي للرئيس رد على محاولات تسكين الفلسطينيين في سيناء».

وأوضح تامر: «جانب مهم من البروباجاندا اللي اعتمد عليها مبارك في آخر ٢٠ سنة من حكمه كان مشهد رفعه العلم المصري على طابا، المشهد اللي تم استغلاله في كل فيديوهات وأغاني الدعاية لمبارك، ومن وقتها (١٩٨٩) خطف مبارك من السادات لقب "بطل الحرب والسلام" وبقى مقترن باسم مبارك في كل الاستفتاءات والانتخابات اللي خاضها وفي لافتات النفاق اللي كان بيعملها له النواب ورجال الأعمال في الشوارع لحد ما تم خلعه في ٢٠١١ رغم ان طابا شريط صغير مساحته ١٠٢٠ متر (في ناس في الطبقة المتوسطة بيوتهم على مساحة أكبر من كدة).

وأضاف «أبو عرب»: «قضية الأرض والحدود عند المصريين مفيهاش هزار وبناء عليها بتتبني شعبيات أو بتنهار، وملهاش علاقة حتى بالورق والكلام ده، ليها علاقة بإن علمنا مينفعش ينزل من على أرض وعينا على الدنيا لقيناها مصرية، لأنك في الواقع برضه هتلاقي ورق يقول إن حلايب سودانية، وورق يقول إن مصر كلها عثمانية».

وأكد: «طبعا ده بيكون مزعج لبعض الناس اللي بتكون مؤمنة إن الإنسان أهم من الأرض والحدود، وبيستغربوا إن فيه ناس بتنتفض وتنزعج علشان جزيرة صخرية ومش بينتفضوا ولا بينزعجوا من الظلم والقتل، لكن يمكن ده له خلفيات تاريخية باعتبار مصر عرفت الحدود بدري جدا وبالتالي فكرة الأرض والحدود دي بتتورث من جيل لجيل بشكل تلقائي، ومش بس حدود البلد دي الحدود بمعناها الأضيق لدرجة إنك ممكن تلاقي خناقة في قرية في الدلتا أو الصعيد يتقتل فيها نص البلد علشان عيلة زحزحت حد الأرض ٢ سم ناحية أرض العيلة التانية ده مش معناه بالضرورة إنه لو تم تسليم الجزيرتين الناس هتنزل الشوارع وتعمل ثورة، لكن الأكيد إن علاقتهم بالسيسي بعدها هتفرق كتير عن علاقتهم بيه قبلها، وإن قطاع كبير من اللي كانوا معاه هيبقوا عليه، وإن جزء كبير من شعبيته اللي قامت على إنه الراجل اللي جاي علشان يحمي البلد من مخططات التقسيم وبيع البلد بينهار».

وبدأت اللجنة التشريعية والدستورية بمجلس النواب أمس الأحد، برئاسة المستشار بهاء أبو شقة، جلسات مناقشة اتفاقية ترسيم الحدود البحرية بين مصر والسعودية.

جدير بالذكر أن الدكتور  علي عبدالعال، رئيس مجلس النواب، قد رفع الجلسة الثانية لاجتماع لجنة الشئون التشريعية والدستورية، لمناقشة اتفاقية تيران وصنافير، على أن تستأنف الجلسة في التاسعة والنصف مساء اليوم، وأن يقتصر الحضور على أعضاء اللجنة التشريعية فقط.