تامر أبو عرب: حبسوا طارق حسين عشان بيقول «تيران وصنافير مصرية»

تضامن الكاتب ومقدم البرامج، تامر أبو عرب، مع طارق حسين، المحامي بمركز الحقوق الاقتصادية والاجتماعية، والشهير بـ«تيتو»، بعد القبض عليه.

وكتب «أبو عرب» عبر حسابه الشخصي على موقع «فيس بوك»: «كان فيه طفل قبضوا عليه علشان لابس تيشيرت مكتوب عليه "وطن بلا تعذيب" عادي. خبر بنقراه كتير جدا وبعد كام يوم بيتنسي خصوصا في الفترة اللي حصل فيها ده من 3 سنين تقريبا لما كان اللي بيمشي في الشارع معاه كانز بيبسي بيتقبض عليه. بس حالة محمود محمد كانت مختلفة. عارفين ليه؟ علشان كان وراه أخ جدع وراجل اسمه "طارق" فضل شهور طويلة شغال على قضيته ومفيش باب مخبطش عليه لا في القانون ولا على السوشيال ميديا وللا في الاعلام، لحد ما بقى هاشتاج "معتقل التيشيرت" أيقونة لمرحلة ما بعد 30 يونيو».

وتابع «أبو عرب»: «وبعد ما خرج محمود قرر طارق يكمل في نفس الطريق، خد ليسانس الحقوق وبقى محامي، مفيش حد بيحتاجه مش بيلاقيه، مفيش قضية لمعتقل وللا سجين سياسي وللا متهم بيتحقق معاه غير لما بيكون جانبه وبيبعت لنا تفاصيل قضيته علشان نتكلم عنه ونفكر الناس بيه، مفيش حملة تدوين عن حد مظلوم غير لما بيكون هو أول واحد شغال عليها».

وأضاف «أبو عرب»: «طارق حسين أو "طارق تيتو" اتقبض عليه امبارح من بيته بتهم من اللي انتوا عارفينها وعلشان بيقول #تيران_وصنافير_مصرية، ولأول مرة حد يحتاجه ويكلمه علشان يكون معاه في قضية وللأسف ميردش عليه لأنه هو كمان بقى محبوس».

واختتم تامر حديثه قائلًا: «طارق من الحاجات الحلوة اللي اكتشفتها في البلد دي آخر 3 سنين، علشان كدة حبسوه، لأنهم أعداء لأي حاجة حلوة».

وألقت قوات الأمن القبض على طارق حسين فجر اليوم، ووُجهت له اتهامات: «الإنضمام لجماعة الإخوان المسلمين، والتحريض على التظاهر».