هيثم الحريري مهاجمًا الحكومة: الفساد وسوء الإدارة سبب سرقة مصر

هاجم النائب هيثم الحريري عضو مجلس النواب، حكومة المهندس شريف إسماعيل بسبب مواقفها من الأزمات المتلاحقة التي يعاني منها المجتمع المصري.

وقال في تدوينة عبر صفحته على موقع التواصل الاجتماعي "فيس بوك": "صباح الخير، في وسط زحمة الحياة بننسي حاجات وبيتوه مننا حاجات، فاكرين زيادة أسعار الدواء اللي حصلت من أكتر من 6 شهور".

وتابع: "الأول بدأت بوجود نقص في بعض الأدوية.. الحكومة العبقرية قررت ترفع السعر عشان ترضى المتحكرين على حساب المواطنين، وبعد تعويم الجنيه ووجود نقص في كثير من الأدوية، الحكومة ستتخذ نفس السبيل ما بين زيادة الأسعار أو تحرير سوق الدواء، طبعًا كان ومازال مفيش اهتمام حقيقي بمصانع الأدوية الحكومية".

وواصل: "طيب فاكرين أزمة الدولار، تجار العملة والمضاربات وأزمة حقيقية في موارد العملة الصعبة جعلت هناك سعرين للدولار، وأصبح هناك أزمة في المصانع واستيراد السلع الغذائية والدواء وغيره، الحكومة بنفس المنهج قررت تغرق الجنيه المصري، طبعًا مفيش أي تفكير عن تقليل الاستيراد بخصوص السلع الغير أساسية ولا اهتمام بخصوص إنشاء مصانع لما يتم استيراده".

وأضاف: "طيب فاكرين أزمة السكر، محتركين ومستوردين معروفين بالاسم، عطشوا السوق ورفعوا سعر السكر، الحكومة عملت إيه؟ رفعت سعر السكر من 4 إلى 5 إلى 7 إلى 11 جنيه، طبعًا مفيش تفكير في مزارع (الفلاح) قصب السكر والبحر ولا تحسين سلالات قصب السكر والبحر، تفتكروا الحكومة حتعمل إيه في بوادر أزمة الرز؟".

وذكر: "سامعك يا اللى بتقول، كل اللي فات ظروف صعبة والحكومة بتحاول وبتبذل أقصى جهد عشان المواطنين الغلابة، حد سمع أو شاف أو حس، بإن الحكومة مهتمة بتقليل الاستيراد، هل يوجد اهتمام حقيقي بخطة مدروسة ومعلنة للاهتمام بالصناعة والمصانع المغلقة والمشروعات الصغيرة ومتناهية الصغر".

واختتم: "طيب هل الحكومة وقفت جنب الفلاح ودعمته بدل دعم المصدرين، مصر مش فقيرة مصر منهوبة بسبب الفساد وسوء الإدارة، برضه الحل مش تغيير الحكومه وامتصاص غضب المواطنين، الحل يبدأ من تغير السياسات يعقبه اختيار وزراء قادرين على تنفيذ السياسات الجديدة".