بالفيديو.. حجاجوفيتش: «سواقين التاكسي في المغرب بيحترموا الزبون على عكس مصر»

نشر الرحالة المصري الشهير، أحمد حجاجوفيتش، فيديو، عبر صفحته الرسمية على موقع «فيس بوك»، يرصد فيه طبيعة سائقي التاكسي في المغرب.

وعلّق «حجاجوفيتش» على الفيديو قائلًا: «في مثل بيقول "لو عايز تعرف مدى احترام البلاد.. اركب تاكسي فيها".. لما سافرت المغرب استعجبت من مدى احترام وكرم وطيبة الشعب المغربي،  قد إيه حبه للمصريين كبير أوي.. ولكن الحاجة اللي لفتت انتباهي جداً هي سواقين التاكسي (أو الطاكسي زي ما المغاربة بتقول)، قد إيه عندهم ذوق و إحترام للزبون».

وأوضح «حجاجوفيتش»: «يعني هناك مفيش حاجة اسمها إن لو أخدت التاكسي من المطار أو محطة القطار تلاقي السواق عايز يبلطج وينصب عليك في السعر، لأن كل سواق تاكسي هناك بيفتح العداد أول ما يتحرك "من غير ما حد يبوس إيده إنه يفتحه" والغريب إنه لما بيعرف إنك سائح وجديد في البلد مش بيفضل يلف بيك كل الشوارع عشان يبينلك إن المشوار طويل وياخد فلوس أكتر والأغرب من ده كله إن لو العداد حسب ١٨ أو ١٩ درهم وانت اديتله ورقة بـ٢٠ درهم بتستعجب إنه بيرجعلك الباقي من نفسه ومن غير ما تقوله أي حاجة ومش بيقولك معيش فكة أو يعمل عبيط و يضرب علي الباقي».

وتسائل «حجاجوفيتش»: «الواحد نفسه يعرف ليه استخدام التاكسي في المغرب متعة.. مش ذنب و عذاب!! مع إنها دولة عربية إفريقية والشعب المغربي على قده زينا».

ويشتهر أحمد مدحت حجاج بـ"حجاجوفيتش"، وهو رحاله مصري ومغامر وخبير سياحي قد زار حتى الآن أكثر من 100 دولة حول العالم.